ERMERA (TATOLI)- Movimentu Sosiál Demokrátiku (MSD) sei harii provínsia tolu bainhira ukun maka hanesan provínsia Ramelau, Kablaki no Matebian.

 Intensaun tau foho tolu ne’e nia naran ba provínsia tanba foho tolu refere nu’udar timoroan sira nia identidade.

“Ne’e katak Timor ne’e labele sentraliza iha Dili. Tenke fahe poder ba iha kraik atu bele serbí povu efetivu no lais liu-tan,” Vise Prezidente MSD, António Ximenes hato’o lia hirak ne’e ba Ajénsia Tatoli bainhira hala’o kampaña  polítika ho tipu diálogu iha Suku Ponilala, Munisípiu Ermera, kuarta ne’e.

Nia informa programa prioridade ne’ebé MSD atu implementa kuandu kaer ukun maka halo uma ba komunidade iha Timor laran tomak, konsentra ba justisa sosiál, katak sei halakon imunidade ba membru Governu no membru Parlamentu Nasionál nune’e bele hatán sira nia sala bainhira komete krime, trata justisa hanesan ba ema hotu.

Programa seluk, Ximenes tenik, harii aeroportu internasionál iha Munisípiu Baucau inklui Covalima (transforma Aeroportu Suai ba aeroportu internasionál) nune’e bele fasilita transporte atu hetan osan.

Iha área edukasaun, lider MSD ne’e dehan, harii eskola kualidade iha Timor laran tomak atu bele fasilita povu kiik nia oan sira hetan edukasaun ida ho kualidade nomós hadi’a kualidade saúde, kontrata pesoál saúde internasionál mai Timor atu fó tratamentu saúde ba povu kiik sira.

Aleinde ne’e, nia hatutan, harii tanke bee boot (bendungan) iha munisípiu atu fornese bee ba ema hotu-hotu tanba maioria populasaun iha Timor susar ba bee-moos.

Iha área agrikultura, Ximenes haklaken, Timor ne’e riku natar maibé natar barak abandonadu tanba timoroan barukten no kondisaun irigasaun la favorável, tanba ne’e, sira sei motiva agrikultór sira atu tau importánsia ba natar no hadi’a irigasaun sira atu fasilita bee ba natar.

“Timor natar barak maibé depende fali importasaun foos hosi rai liur ne’e la tama iha kakutak. Entaun, ami iha papel boot ida oinsá atu motiva agrikultór sira para reativa natar sira ne’ebé abandonadu. Só liuhusi dalan ida ne’e maka bele kore dependénsia ba foos importasaun,” atuál Prezidente PDC ne’e afirma.

Jornalista: Xisto Freitas

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here