Aniceto Guro-Berteni Neves.

Husi: 

Aniceto Guro-Berteni Neves

Membru Movimentu Solidaridade Salva Klínika Bairopite

Hanesan publiku akompaña deklarasaun iha media no Dr. Daniel Murphy nu’udar mediku ne’ebé responsável ba funsionamentu Klínika Bairopite (KBP) esklarese katak desde hahú loron segunda data 03 fulan Abril 2018, KBP hapara sira-nia atendementu ba pasiente baisa (rawat nginap), taka fatin partus (la simu inan-isin rua ba partus), la atende pasiente mal-nutrisaun.

Maibé sei kontinua de’it atendementu no fó konsulta ba pasiente sei la baibain, enkuantu iha pasiente sira grave sei rekomenda ba HNGV; Antes ne’e, iha tinan hirak-liubá KBP enfrenta problema hanesan, konsege rezolve ho tulun husi Dr. José Ramos Horta nu’udar Prezidente Republika momentu-ne’e.

Konsege rezolve situasaun balun maibé la’ós problema hotu iha KBP. Husi tempu ba tempu KBP kontinua sai objektu ba konflitu interese ba timoroan sira nian. KBP funda husi Mana Lu ho Dr. Daniel Murphy no hahú operasionaliza iha tinan 1998 hodi atende fó tratamentu ba guerilleiru sira ho joventude sira ne’ebé moras ka hetan tiru kanek husi forsa Indonézia. Guerilleiru balun ho joventude lubun ida konsege salva nia vida iha KBP ne’e. KBP karakteriza ho klínika ba ema ki’ak, kbiit-laek sira, tanba ne’e hetan apoiu husi Povu husi Estadu Unidus Amerika (EUA), Povu Austrália no seluk tan. Lo’os duni hanesan Ministro Saúde Dr. Rui Maria de Araújo hateten iha kanál TVTL foin dadauk ne’e katak Governu fó apoiu liuhusi koloka pesoál mediku sira, maibé KBP iha problema internál ne’ebé tenke rezolve internalmente. Iha komunikasaun via medsos (facebook) mos dirijente balun husi Ministériu Saúde mós konfirma kona-ba problema internál KBP nian no tenke rezolve.

Dirijenti ne’e mós konfirma katak Konsellu-Board KBP nian mesak ema matenek ho rekursu kualifikadu de’it. Agora, mesak matenek no kualifikadu de’it mais pior liu tiha atu labele rezolve problema internál ne’e? Seraque iha konflitu interese ba KBP? Apakah tebes, problema internál ne’e mak implika ka impede doasaun husi Povu Austrália sira ba KBP ne’e? Presija buka-tuir hodi hatene! Husi problema ida ne’e, ita bele detekta ona kauza indikasoens ba problema interna KBP nian! Iha informasaun ne’ebé indika ba diskonfia, katak iha timoroan balun ne’ebé senti-an riku no matenek hakarak sosa klínika ne’e hodi privatiza KBP nu’udar klínika komersiál.

No fim identifika mós katak pesoál ne’ebé Ministériu Saúde mensiona nu’udar matenek i rekursu kualifikadu ne’e indika ba timoroan sira ne’ebé sai mós nu’udar Konsellu Board KBP nian. Sim Senhor! Sira susesu halo advokasia ba prestasaun servisu ekipa médiku KBP nian hodi hetan simpatia no apoiu husi Povu Austrália ho osan no ekipamentu di’ak kada tinan inklui mobiliza apoiu médiku Australianu sira mai presta servisu iha KBP. Kestaun mak ne’e, se’e sira bele mobiliza opiniaun hodi hetan apoiu eksternál, tanbasá sira labele rezolve problema internál iha KBP ne’e rasik? Presija buka hatene! Nota katak klínika Bairopite tama iha krizi momentu akontese kontradiksaun entre Timoroan sira iha Konsellu Board ho Fundador KBP (Mana Lu & Dr. Daniel Murphy) ne’e.

Pozisaun fundadór KBP firme atu KBP nu’udar klínika ba ema kiak-kiak sira, Maubere-Buibere Ain-tanan kbiit-laek sira-nia klínika, tanba prinsípiu ida ne’e, kontráriu fali ho timoroan matenek sira iha Konsellu Board nian. Diferénsia ne’e hodi hamosu konta-bankaria rua ba KBP. Iha inísiu konta bankária iha autoridade fundadór nian, ikus mai Konsellu Board loke fali konta bankária ida seluk no doasaun ka apoiu hotu husi Austrália tama fali ba konta bankária versaun Board nian. Iha dada-lia balun ho dirijenti KBP konfirma katak, sira la hatene osan doasaun hira mak tama ona ba KBP liuhusi konta bankária versaun Board nian no gasta ona ba saida-saida durante ne’e no ikus tau KBP iha risku ba limita atendementu. Iha informasaun ne’ebé bele fiar katak agora Konsellu Boar harii ketak fali Klínika ida liuhusi Asosiasaun Maluk-Timor, planu atu harii iha Raikotu, Comoro Dili.

Good Luck! Dirijenti KBP ne’e rekuiñese ho apoiu doasaun hirak ne’e konsege presta atendementu kualifikadu iha KBP. Maibé depois kontradiksaun hirak ne’e, KBP mantein de’it ho fundus ne’ebé limita iha konta bankária klínika nian. No agora hotu hodi nune’e implika ba redus servisu atendementu ne’e. Atu asegura KBP kontinua presta servisu atendementu ba Povu ki’ak, aileba kbiit-laek sira, nune’e, atividade sosiedade sívil, estudante universitáriu inísia hodi mobiliza asaun solidaridade Centavos $0.05 ba salva ema moras iha KBP.

Mai ita fó tulun-ba, só ita ne’ebé moras no kbiit-laek mak hatene susar no terus maluk moras sira, só ita ne’ebé kbit-laek mak hatene maluk sira ne’ebé kbiit-laek! Labele sai Maubere Falsu! Ba situasaun ida ne’ebé tau KBP iha risku, ami sei buka nafatin kanál informasaun no publika ba Povu Timor sira hatene!

HAKEREK NO HATÁN

Please enter your comment!
Please enter your name here