Prezidente Tribunál Rekursu, Deolindo dos Santos. Imajen/Xisto Freitas

DILI, (TATOLI) – Prezidente Tribunál Rekursu (TR), Deolindo do Santos, anúnsia partidu polítiku (ParPol) ualu (8) mak admitidu hodi konkore iha eleisaun antesipada parlamentár iha 12 maiu no partidu hitu mak lakon ona estatuta hosi TR tanba la partisipa programa kampaña iha nivel lokál no nasionál liu tinan lima.

Lista kandidatura hosi ParPol ne’ebé atu konkore iha eleisaun antesipada mak partidu koligasaun partidária hanesan Aliansa Mudansa ba Progresu (AMP), Frente Dezenvolvimentu Demokrátiku (FDD), Movimentu Sosiál Demokrata (MSD), Movimentu Dezenvolvimentu Nasionál (MDN), Partidu Repúblikanu (PR), Partidu Esperansa Pátria (PEP), Partidu FRETILIN no Partidu Demokrátiku (PD).

Enkuantu partidu ne’ebé mak lakon estatuta hosi TR mak Asosiasaun Sosiál Demokrata Timorense (ASDT), Klibur Oan Timor Asuwain (KOTA) mezmu sira hatama lista ba TR hodi konkore iha eleisaun maibé liu tinan lima sira la partisipa programa kampaña, nune’e partidu rua ne’e perde estatutu inklui partidu sira seluk ne’ebé lakon ona estatutu mak Partidu Demokrátiku Liberál (PDL), Partidu Unidade Nasionál (PUN), Partidu Repúblika Nasionál Timor-Leste (PARENTIL), Partidu Nasionál Timorense (PNT) no Partidu Trabalhalista Timor (PTT).

“Prosesu verifikasaun lista kandidatura ho prazu loron 10 maibé ita konklui lalais, rezultadu verifikasaun hatudu partidu ualu mak sei kompete iha eleisaun antesipada no restante lakon estatutu”, Prezidente TR anúnsia ofisiálmente iha TR, Kaikoli, kuarta (28/3).

Molok ne’e, TR simu lista mai hosi koligasaun FDD ne’ebé kompostu hosi partidu haat mak partidu Uniaun Demokrátika Timorense (UDT), Partidu Dezenvolvimentu Nasionál (PDN), Partidu Uniaun Dezenvolvimentu Demokrátiku (PUDD) no Frente Mudansa.

Lista daruak mak mai hosi koligasaun Aliansa Mudansa ba progresu (AMP) ne’ebé kompostu hosi partidu Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP) no Klibur Haburas Unidade Nasionál Timor Oan (KHUNTO).

Lista da-toluk mai hosi koligasaun MDS kompostu hosi partidu Unidade Rezisténsia Timorense (UNDERTIM), Assosiasaun Populár Monarqia Timorense (APMT), Movimentu Libertasaun Povu Maubere (MLPM) no Partidu Liberta Povu Aileba (PLPA).

Lista da-haat mai hosi koligasaun MSD kompostu hosi partidu haat mak Partidu Sosialista Timor (PST), Partidu Sosiál Demokrata (PSD), Sentru Asaun Sosiál Demokrata Timorense (CASDT-sigla portugés) ho Partidu Dezenvolvimentu Kristaun (PDC-sigla portugés).

Lista da-lima mai hosi partidu Partidu Republikanu (PR), lista da-neen mai hosi Partidu Esperansa Pátria (PEP), lista da-hitu mai hosi partidu Klibur Oan Timor Asuwain (KOTA), Lista da-ualu mai hosi partidu Frente Revolusionária Timor-Leste Independente (FRETILIN), lista da-sia mai hosi Partidu Demokrátiku (PD). Lista da-sanolu mai hosi Partidu Asoasaun Sosiál Demokrátiku Timorense (ASDT).

Depois TR verifika hotu no haree ba artigu 23. 6/2006 28 dezembru ne’ebé altera lei númeru 9. 5 maiu haree mós ba artigu 93 lei konstituisaun nian.

Ho lei hirak ne’e, TR verifika katak lista ne’ebé aprezenta mai TR la iha dúvida ruma iha nia autentisidade.

TR depios verifika lista kandidatura sira ne’ebé legalmente rejistradu ho kandidatura sira ne’ebé konsta iha lista hirak ne’ebé aprezentada la iha mak afetadu ho sirkunstánsia ne’ebé elejibilidade no limite sira nia kapasidade aprezenta nu’udar kandidatu. Ho esepsaun iha partidu rua mak Partidu KOTA no ASDT.

Komisaun Nasionál ba Eleisaun (CNE-sigla portugés) nia rekerimentu ne’ebé hato’o mai TR iha loron 19 marsu 2018 informa ba TR kona-ba partidu hirak ne’ebé bele konkore iha eleisaun antesipada no informa mós partidu balun ne’ebé la iha kondisaun ona atu bele kompete iha eleisaun antesipada.

Haree ba artigu númeru 4, 5 númeru 3/2004 ne’ebé altera lei 2016. Lei ParPol nian hateten perde estatutu parpol eh organizasaun ne’ebé la partisipa nia programa rasik iha nivél lokál eh nasionál ne’ebé liuhosi tinan lima, iha sirkunstánsia ne’e CNE komunika ba TR atu bele deklara perde estatutu partidu nian.

TR hafoin verifika hotu partidu 31 ne’ebé rejistradu iha TR maibé partidu ida mak perde estatutu ona mak PPT, entaun dadaun ne’e apenas partidu 30 ne’ebé mak iha.

Hafoin TR haree hotu partidu 30 verifika mak KOTA rejistu iha TR iha 31 janeiru 2007, ASDT rejistu iha 22 dezembru 2004, PTT rejistu 11 outubru 2010, PNT rejistu iha 7 outubru 2005, PUN rejistu iha 12 dezembru 2006, PDL rejistu iha 4 janeiru 2011, PARENTIL rejistu iha 20 janeiru 2012.

TR depois halo verifikasaun konsta katak partisipasaun ikus partidu ASDT, KOTA, PUN, PDL, PARENTIL no PPT ho sira nia programa rasik iha eleisaun 7 jullu 2012.

Partisipasaun ikus hosi ParPol PNT iha eleisaun 30 jullu 2007. Portantu, partidu hirak ne’e la tuir eleisaun liuhosi tinan lima ona tantu iha lokál no nivél nasionál ho sira nia programa rasik.

Bazea ba artigu 1 númeru 4 lei númeru 3/2004, 14 abril altera ho lei númeru 2/2016, 3 fevereiru katak partidu hirak ne’e tenke deklara perde estatutu nu’udar partidu.

ASDT, KOTA, PDL, PUN, PARENTIL, PNT ho PPT. Ho konsekuénsia tomak tanba sira la aprezenta lista kandidatura iha eleisaun 2018 nian.

Ho fundamentu mak  deside hanesan tuir mai ne’e, katak TR admite lista hirak ne’e mak bele tuir eleisaun antesipada parlamentár iha 12 maiu mak lista kandidatura ne’ebé mai hosi koligasaun FDD, AMP, MDN, MSD, PR, PEP, FRETILIN no PD, enkuantu partidu ne’ebé la admite lista kandidatura mak ASDT, KOTA.

Deklara lakon estatutu nu’udar partidu polítiku hirak mak tuir mai ne’e, PDL, PUN, PARENTIL, PNT, PPT, KOTA no ASDT.

Desizaun ne’e sei notifika ba reprezentante lista kandidatura sira nian no remete kopya ba CNE no STAE.

Notifika mós partidu polítiku sira ne’ebé la aprezenta lista kandidatura hodi lakon estatutu partidu mak PDL, PUN, PARENTIL, PNT ho PPT.

Prosesu verifikasaun lista kandidatura parlamentár hosi partidu polítiku ho prazu loron 10 nia laran maibé prosesu konklui lalais lista kandidatura.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here