iklan

AINARO, MUNISÍPIU

Komunidade Maubisse Preokupa Ba Bee-Moos

Komunidade Maubisse Preokupa Ba Bee-Moos

Komunidade Maubisse entusiaz rona Programa Sétimu Governu Konstitusionál hosi Primeiru-Ministru, Marí Alkatiri ho membru Governu sira. Foto Tatoli/Xisto Freitas

MAUBISSE, (TATOLI) – Komunidade Postu Administrativu Maubisse, Munisípiu Ainaro, oras ne’e infrenta difikuldade ba bee-moos.

Kestaun ne’e komunidade no autoridade lokál hosi Maubisse levanta iha aprezentasaun Programa Sétimu Governu Konstitusionál ne’ebé hala’o hosi Primeiru-Ministru, Marí Alkatiri, ho membru Governu sira iha salaun Parókia Maubisse, sesta ne’e.

Reprezentante organizasaun rezisténsia hosi Maubisse, José Alberto Carlos, haktuir kestaun falta bee-moos halo labarik, estudante sira sai vítima tanba tenke ba kuru bee kuaze kilómetru 3.

“Estudante sira sempre tarde tama eskola no balun la konsege partisipa iha aula aprendizajen tanba tenke okupa ba bee mós ne’ebé ho distánsia dook tebes”, haktuir.

José hatutan ho distánsia bee-matan, komunidade obrigatoriamente tenke sosa bee-moos no balun uza udan-been ba nesesidade lor-loron.

Tanba komunidade balun uza udan been, nia tenik, konsekuénsia labarik to’o ema boot sira tenke infrenta moras hanesan isin katar, TBC (tubercolusse) no moras pulmaun.

Hatán ba kestaun ne’e, Xefe Governu hateten bee-moos ne’e fundamentál ba ema nia moris, tanba ne’e Governu fó prioridade ba asuntu refere.

Nia esplika loloos osan biloens $14 ne’ebé antes ne’e Governu gasta ona bele rezolve bee-moos no nesesidade seluk.

“Ita lahatene tanbasá Governu gasta osan biloen ba biloen maibé la konsege rezolve bee-moos, maibé laiha buat ida, Governu ida ne’e iha responsabilidade boot atu haree kestaun sira ne’e”, esklarese.

Biban ne’e komunidade  Maubisse mós levanta kestaun seluk katak suku sia iha Maubisse seidauk asesu ba enerjia eletrisidade no balun mós hato’o katak riin eletrisidade iha Aitutu (Maubisse) no Dare (Ainaro) barak monu, nune’e prejudika eletrisidade kleur ona la lakan.

Hatan ba ne’e, PM esklarese Governu la’o de’it ho orsamentu Duo-Désimu ne’ebé ki’ik, maibé kontinua buka solusaun liuhusi serbisu hamutuk ho tékniku no komunidade atu dada ahi ba fatin ne’ebé seidauk tama.

“Ha’u simu ona informasaun kona-ba problema ida ne’e hosi Ministru Adjuntu Primeiru Ministru asuntu Governasaun, José Reis, no oras ne’e Governu buka hela meius atu rezolve imediata”, tenik.

Jornalista: Xisto Freitas

Editora: Rita Almeida

iklan
iklan

Leave a Reply

iklan
error: Content is protected !!