Frente Esterna-Interna Maka Hahoris Libertasaun Nasionál

0
563
Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur.

DILI (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Major Jenerál Lere Anan Timur hateten lider istóriku sira ne’ebé uluk serbisu hamutuk tantu Frente Esterna no Frente Interna, tau esforsu no tau matenek hamutuk maka ohin loron Timor-Leste sai nasaun soberanu ida.

“Ohin loron ita haree, kuaze jerasaun foun sira hakarak fahe lider istóriku sira ne’e. Sira ne’ebé fahe lider sira, tanba lahatene istória no la moris iha prosesu libertasaun nasionál ninian,” Lere hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, Kuarta ne’e, relasiona ho ativista partidu nian balun lansa propaganda hodi soran lider rezisténsia sira.

Nia haktuir, lahó Frente Esterna, Frente Interna labele halo buat ida no lahó Frente Interna mós Frente Esterna la halo buat ida.

“Lahó Frente Interna, Dr. José Ramos Horta ho ninia ekipa bele hakilar dala atus ida mós ema li’ur sei la rona. Lahó Jose Ramos Horta ho ninia ekipa mós ami sira ne’ebé iha rai laran barak mate ona, Sr. Xanana bele mate iha Cipinang no dala ruma ami sira ne’ebé biru maka’as ne’e maka sei bele moris. Tanba ne’e, husu jerasaun foun sira labele fahe lider istóriku sira maibé buka oinsá lori sira tenke hamutuk,” eis lider rezisténsia ne’e esklarese.

Lere mós husu ba Ramos Horta, Mari Alkatiri, Xanana Gusmão ho sira seluk tenke iha konsensu atu lori Timor moris iha estabilidade no progresu nia laran.

“Eleisaun antesipada ne’ebé mai, ha’u apela ba lider sira atu sukat lian, sai edukadu. Foka de’it ba programa oinsá atu lori moris di’ak ba povu,” nia apela.

Lere informa katak F-FDTL prontu atu asegura eleisaun antesipada, maski oras ne’e Forsa Armadas enfrenta hela difikuldade balun.

(Jornalista: Xisto Freitas)

(Editór : Manuel Pinto)

HUSIK IDA HATÁN