Tiago Tenke Lori Mai TL No Investiga Embaixada Portugal Iha Dili

0
250
Tiago Guerra no nia kaben Chan Fong Fong Guerra. Foto espesiál

DILI (TATOLI) –Ministru Negósiu Estranjeiru no Kooperasaun (MNEK), Aurelio Guterres afirma katak nia parte halo ona kontaktu ho Ministériu Negósiu Estranjeiru Portugal hodi lori hikas sidadaun portugés Tiago Guerra ho nia fen Chang Fong Fong Guerra mai Timor-Leste hodi submete ba prosesu julgamentu.

Aleinde de ida ne’e, Aurelio Guterres husu atu investiga Embaixada Portugal iha Dili tanba deskonfia fasilita emisaun pasaporte.

“Hosi parte diplomasia, ha’u komunika direita ba Ministériu Negósiu Estranjeiru Portugal hodi husu buat rua ba Portugal hodi apoia prosesu tomak hosi sidadaun Nain rua involve kazu iha Timor-Leste atu lori hikas mai, nune’e bele tuir prosesu julgamentu iha nasaun ne’e, enkuantu husu atu halo investigasaun internal iha Embaixada Portugal iha Dili katak sé mak emite pasaporte ba arguidu Nain rua ne’e,” MNEK, Aurélio Guterres ba jornalista sira iha Aeroportu Internasionál Nicolau Lobato ohin hafoin fila hosi reuniaun Azean iha Manila Filipina.

Aurelio mós aproveita oportunidade solista ba Ministériu Negósiu Estranjeiru Portugal iha Timor-Leste katak oinsá mak sira koopera ita hodi investiga sé mak emite pasaporte ba Arguidu Tiagu Guerra ho nia fen Chang Fong Fong Guerra ka Tammy Guerra no oinsá mak lori sidadaun portuges Nain rua lori hikas mai Timor-Leste atu tuir prosesu justisa iha ita nia nasaun.

MNEC mós kontinua apresia servisu autoridade hosi Ministériu Justisa, Prokuradoria Jerál, Ministériu Seguransa no ekipa Interpol ne’ebé trata namanas hela asuntu ne’e, espera katak posivelmente sira bele lori fila sidadaun Portuguese Nain rua mai Timor-Leste tanba sira involve krime iha Timor.

“Ita nia autoridade hosi tribunál, Interpól no sira seluk dadaun ne’e servisu hela, ita hein prosesu la’o, kuandu iha ona finalidade ho termu relatóriu mak foin ita halo konkluzaun,” Aurelio fó esperansa.

Iha fatin hanesan Embaixadór Portugal iha Timor-Leste, Luis Manuel Barreira de Sousa, dehan Relasaun ho emisaun pasaporte ba sidadaun portugés Nain rua, Embaixadór Portugal iha Timor-Leste, forma ona ekipa inkéritu ida atu bele investiga sé mak involve emisaun pasaporte ba arguidu Tiagu Guerra ho nia fen.

Luis Manuel Barreira de Sousa mós konkorda atu sidadaun Nain rua lori hikas mai Timor, tanba tuir nia  hatene sidadaun Portugés Nain rua ne’e halo krime iha Timor tanba ne’e tenke submete mai Timor-Leste hodi prosesa tuir lei ne’ebé vigor iha nasaun ne’e.

Entretantu, iha fulan Jullu 2016, arguidu Nain rua nia pasaporte mate ona maibé ikus mai sira konsege hetan fali pasaporte foun ne’ebé deskonfia emite hosi Embaixada Portugal iha Timor-Leste.

Tribunal primeira instánsia Distritál Dili antes ne’e mós kondena ona arguidu sira ho pena tinan 8 kastigu tanba prova sira nain rua ne’e komete krime pekulatu, ho Brankeamentu kapitais.

Maibé sira Nain rua husu rekursu ba desizaun Tribunál primeira instánsia liuhosi sira nia advogadu hodi halo rekursu ba Tribunál rekursu. Iha prosesu Tribunál rekursu hasai hodi bandu arguidu nain rua la bele husik hela Dili antes Tribunál foti desizaun ruma, maibé realidade antes desizaun sai arguidu nain rua halai ba Australia ho pasaporte ne’ebé duplikata iha loron 9 Novembru 2017 ho ró ki’ik ne’ebé liuhosi Betanu.

Sira nia viajen konsege trava hosi forsa fronteira Australia tanba konsidera tama ba territóriu Australia nian ho ilegál no pasaporte la hetan karimbu ruma.

To’o oras ne’e arguidu Nain rua sei iha hela Darwin, Austrália. Tanba ne’e MNEK husu ba Embaixada Portugal atu buka meiu oinsá mak arguidu sira ne’e bele fila hikas mai hodi prosesa tuir lei Timor-Leste nian.

(Jornalista : Zezito Silva)

(Editór : Manuel Pinto)

HUSIK IDA HATÁN