PN Preokupa Ho Arguidu Tiago Nia Halai

0
128
Deputadu sira iha Parlamentu Nasionál. Foto espesiál

DILI (TATOLI)-Parlamentu Nasionál (PN) preokupa ho arguidu Tiago Guerra (Ema Portuguese) no nia kaben Chan Fong Fong Guerra, ne’ebé halai sai husi Timor-Leste (TL) komete kazu Brankeamentu kapitál kuaze dolar rihun 800.

Arguidu tribunál primeira instánsia antes ne’e deside labele sai husi TL atu responsabiliza sira-nia aktu.

“Ida ne’e kazu ida ne’e mak sériu no presiza haree, tanba saida mak nia halai? Se mak fasilita nia halai?,” deputadu Aurélio Freitas kestiona perante profisionál komunikasaun sosiál sira, iha Parlamentu Nasionál (PN), Kuarta (15/11).

Tuir, deputadu husi bankada FRETILIN (Frente Revolucionário de Timor-Leste Independente) ne’e katak arguidu bainhira hetan ona TIR (Termo de Identidade Residência) ne’e signifika pasaporte arguidu sira nian iha prokuradór no autoridade kompetente sira-nia liman.

“Halai liuhusi dalan loos ka dalan tikus (laho-red) ka uza ró, ne’e presiza haree,” deputadu Aurélio Freitas akresenta.

Tuir nia, arguidu sira ne’e maski sidadaun portugés maibé nia komete krime iha Timor-Leste tanba ne’e tenke mai hatán nia kazu iha Timor-Leste no la iha dalan atu fila ba Portugal se kazu ne’e la’o hela.

“Labele husik nia ba fali fatin seluk satán nia rain,” insiste deputadu bankada FRETILIN, Aurélio Freitas, ne’e.

Arguidu sira ne’ebé halai sai ona husi territóriu Timor-Leste, reprezentante povu ne’e husu ba autoridade kompetente atu halo ligasaun di’ak ho Austrália hodi bele deporta fila sira mai iha Timor-Leste hodi kumpre lei no orden nasaun ne’e nian.

“Husu ba entidade hotu-hotu, autoridade kompetente atu halo ligasaun di’ak ho Austrália, lori fila ema na’in rua ne’e mai responsabiliza nia aktu kríme ne’ebé mak nia halo iha ne’e, labele husik halai,” nia husu.

Nia mós kestiona kona-ba oinsá esforsu halo akordu estradisaun, deputadu Aurélio Freitas esplika, ita haree iha ona prosesu serbisu hamutuk entre nasaun, foin daudauk arguidu Juga Gama lori fila mai liuhusi serbisu hamutuk; hanoin katak bele serbisu hamutuk ho nasaun viziñu hanesan Austrália atu bele lori fila fali arguidu na’in rua ne’ebé mak halo krime iha ita-nia rain.

Nune’e mós ba eis-ministra Finansa, Emília Pires ne’ebé akuzadu sai arguidu ba aktu krime, husu ba governu no entidade kompetente atu bele halo esforsu maka’as hodi bele lori fila fali mai Timor atu hatán ninia aktu ne’ebé mak nia komete.

“Ha’u la aseita atu hatán iha ne’ebá, tenke ser lori mai Timor tanba krime ne’e akontese iha Timor-Leste,” realsa deputadu bankada FRETILIN ne’e.

Nune’e mós, deputadu bankada CNRT (Conselho Nacional da Reconstrução de Timor-Leste), Natalino dos Santos hateten kazu arguidu Tiago Guerra no nia kaben Chan Fong Fong Guerra ne’e apar ba instituisaun kompetente sira hanesan tribunál, prokuradór, Ministériu Justisa (MJ) no Ministériu Negósiu Estranjeiru no Kooperasaun (MNEK) atu haree asuntu ne’e.

“Agora depende ba gravidade kazu ne’e,” dehan deputadu husi partidu mais votadu daruak iha eleisaun lejislativa 2017 ne’e.

Kona-ba kazu eis-ministra justisa, Emília Pires, ne’ebé ohin loron seidauk fila fali mai Timor-Leste hodi kumpri orden justisa, deputadu Natalino dos Santos hateten katak bainhira tribunál seidauk foti desizaun finál nia “tauk” atu dehan.

“Ita dehan ema ne’e arguidu bainhira iha desizaun finál. Ha’u atu dehan nia kondenadu mós ha’u ta’uk tanba seidauk iha desizaun finál,” deputadu CNRT ne’e fó razaun.

Entretantu, antes ne’e, Inocêncio Xavier nu’udar program officer AJAR (Asian Justice and Rights) konsidera katak sidadaun portugés, Tiago Guerra no nia kaben Chan Fong Fong Guerra halai sai husi Timor-Leste (TL), ikus mai autoridade Australiana iha Darwin, Austrália, ne’e sériu tanba autoridade seguransa TL mak ladún halo serbisu di’ak.

 (Jornalista: Rafy Belo)

(Editór : Manuel Pinto)

 

HUSIK IDA HATÁN