AJAR Konsidera Kazu Tiago Guerra ho Chang Fong Sériu

0
318
Tiago Guerra no nia kaben Chan Fong Fong Guerra. Foto espesiál

DILI, (TATOLI) – Reprezentante Program Officer Asia Justice and Rights (AJAR), Inocêncio Xavier konsidera arguidu, sidadaun portugés, Tiago Guerra no nia kaben Chan Fong Fong Guerra ne’ebé halai sai husi Timor-Leste (TL), ikus mai autoridade Australiana kaptura iha Darwin, Austrália ne’e sériu. Tanba autoridade seguransa TL mak laduun halo serbisu di’ak.

“Tanbasá mak ema ne’e tenke halai sai husi ita-nia teritóriu nasionál, se bainhira nia sei hetan ona sentensa iha tribunál primeira instánsia ba oito anos (tinan ualu) prizaun”, hatete ba jornalista sira iha salaun enkontru Asosiasaun-HAK, Farol, ohin.

Tuir nia haree, situasaun ne’e akontese tanba autoridade la halo serbisu di’ak hodi asegura katak ema sira ne’ebé mak hetan ona desizaun husi tribunál atu labele sai husi Timor. Signifika dokumentu hanesan pasaporte no seluk tan laiha sira nia liman (sita), atu halo rekursu iha loron 15, labele sai husi teritóriu nasionál.

“Agora pergunta mai ita mak ne’e, seraké iha sentensa ne’e, Polísia Investigasaun Kriminál no Ministériu Públiku halo serbisu rigorozu duni atu arguidu labele sai husi Timor ka lae?”, kestiona.

Inocêncio mós kestiona husi jornál sira hatudu katak pasaporte ne’ebé Tiago Guerra no nia kaben Chan Fong Fong Guerra tribunál sita ona maibé ikus mai iha tan pasaporte ida, ne’ebé konsege halo kazál ne’e halai sai husi Timor-Leste.

“Se mak fasilita ida ne’e?”, kestiona Inocêncio Xavier perante profisionál komunikasaun sosiál sira.

Nia esplika, kódigu penal hateten ema se mak uza meius saida de’it hodi hasees ema ne’e husi prosesuál, sei hetan dubru ninia sentensa.

“Ema ne’e mak ami kondena, ami kondena tebes hahalok ne’ebé mak asegura ema ne’e hodi halai sai husi Timor, ne’e labele tolera, ba sese de’it”, akresenta.

Inocêncio husu servisu bilaterál sira liliu Portugal ho Timor-Leste iha akordu sira ba CPLP (Comunidade dos Países da Língua Portuguesa) nian atu hatudu kooperasaun di’ak liuhusi asaun.

“Asaun ida mak ne’e, mezmu nia ema sidadaun Portugal, nia halo sasan (problema-red) iha teritóriu nasionál Timor-Leste, tenke simu sentensa”, realsa.

Inocêncio mós akresenta arguidu sidadaun portugés, Tiago Guerra no nia kaben Chan Fong Fong Guerra konsege halai sai husi Timor-Leste iha loron hirak liubá depois autoridade australiana kaptura, la’ós justisa de’it mak fraku maibé autoridade seguransa liliu polísia sira, PSIK (Polísia Investigasaun Sientífika no Kriminál).

Sira tenke fó informasaun ba aeroportu no portu sira atu ema sira ne’e labele halai sai.

“Ba aeroportu karik, informasaun tenke fó ba iha ne’ebá. Servisu intelejénsia, servisu portu no aeroportu nian, polísia marítima atu hatene atu ema ne’e labele sai husi teritóriu nasionál”, nia fó hanoin.

Kona-ba pasaporte seluk ne’ebé kazál portugés ne’e iha hafoin hetan detensaun iha Darwin-Austrália, reprezentante Program Officer AJAR, Inocêncio Xavier hateten presiza iha investigasaun, kaer metin nafatin ba iha “Prezunsaun Inosente”.

“Ministériu Públiku halo investigasaun! Ministériu Públiku hola inisiativa fó mandatu ba polísia investigasaun kriminál atu serbisu hodi hatene loos ba akuzaun ka informasaun sira ne’ebé mak liuhusi mídia”, dehan.

Hodi hatutan presiza asegura, arola dokumentu ka informasaun hotu, hodi hatene kona-ba verasidade husi  informasaun sira ne’ebé mak hetan.

“Ita bele deskonfia, maibé investigasaun mak bele justifika, loos ida ne’ebé, sala mak da ne’ebé?,” nia kestiona hodi hakotu.

Entretantu, kazál portugés ne’e kapturadu iha aeroportu internasionál Nicolau Lobato, Dili, iha outubru 2014 no tinan ne’e arguidu nu’udar sidadaun Portugal ne’e hetan sentensa ba tinan ualu tanba kazu brankeamentu kapitál kuaze dolár rihun 800.

Jornalista: Rafy Belo

Editora: Rita Almeida

HUSIK IDA HATÁN