DILI, (TATOLI) – Kooperasaun entre Ministériu Agrikultura no Peska (MAP) no Autoridade Inspesaun no Fiskalizasaun ba Atividade Ekonómika no Sanitária (AIFAESA), haruka ona amostra manu-tolun hodi halo teste laboratóriu iha Universidade Udayana-Bali, Indonézia.
Relasiona ho espekulasaun iha públiku katak mosu ona manu-tolun falsu iha Timor-Leste, nune’e AIFAESA liuhusi nia inspetór sira halo inspesaun no foti ona amostra manu-tolun iha distributór lima ka neen husi Indonézia, Tailándia nomós iha rai-laran hodi entrega ona ba Diresaun Nasionál Veterinária (MAP) ne’ebé haruka ona nia amostra bá Indonézia.
Diretór Operasaun AIFAESA, Gabriel da Costa informa tanba laiha laborátóriu hodi halo teste ba manu-tolun, nune’e MAP fasilita AIFAESA hodi buka dalan no informasaun katak Universidade Udayana iha kapasidade atubele halo teste manu-tolun no daudaun ne’e AIFAESA hein de’it rezultadu laboratóriu.
Enkuantu AIFAESA mós haree ba folin manu-tolun ne’ebé baratu liu ho folin sentavu 10 iha merkadu.
“Ema deskonfia buat sira ne’e falsu maibé ami koko bá hola duni mai da’an mas realidade ida sentavu 10 ne’e ita da’an han di’ak hela. Kona-ba nia presu ne’e tanba ita-nia merkadu ne’e livre, operadór ekonómiku sira hasa’e presu ita labele halo buat ida, sé mak hatún presu ne’e ba ita di’ak liu no aas liu mós lei labandu ida, agora sei livre hela ne’ebé agora ami halo kontrola de’it ba produtu sira ne’ebé ita deskonfia, foti amostra halo teste no haree ba baze legál”, Gabriel hatete iha Matadouru, ohin.
Sobre manu-tolun falsu ne’ebé sirkula ona, Gabriel hatete até agora AIFAESA seidauk hetan manu-tolun falsu no bele deskonfia maibé teke halo teste no hetan rezultadu laboratóriu mak foin bele foti desizaun.
“Ita-nia konsumidór sira seidauk halo keixa mai AIFAESA maibé iha mídia sosiál mak tau no ami rasik mós tuun duni iha fatin koko no han maibé di’ak duni no laiha falsu”.
Aleinde ne’e AIFAESA mós sei haree sobre falsifikasaun data expire ba produtu bee (aqua) danone ne’ebé deskonfia empreza balun hamoos data liu prazu no tau data foun fali.
“Ne’e iha maibé seidauk deteta no ami sei buka tuir nafatin. Informasaun tama no ami AIFAESA rasik buka maneira oinsá para tenke hetan ida ne’e, ita deskonfia maibé tarjetu loos ona mak ami foin haree”.
Tanba menus orsamentu nune’e difikulta AIFAESA hodi hetan informasaun tanba atu hetan informasaun tenke gasta osan.
“Ita atu hetan ne’e fasil hela, ezemplu hanesan distributór boot sira, karyawan sira ne’e hatene produtu sira ne’e rai iha ne’ebé tanba sira iha laran, no ami bele deteta soké sira labrani atu fó hatene tanba sira serbisu iha ne’ebá”.
Nune’e, AIFAESA esforsu hodi investiga empreza balun ne’ebé manipula data produtu no neineik sei hetan.
“Buat ne’e iha nia label data expire ne’e iha alat khusus atu delete mas ami tama iha sira-nia fatin (loja) mak hetan alat sira ne’e iha, fasil mai ami tanba ne’e evidénsia. Agora hein de’it bainhira ami bá nia fatin de’it atu deskobre buat ne’e”.
Jornalista: Maria Auxiliadora
Editora: Rita Almeida
