DILI (TATOLI)- Prezidente Federasaun Kooperativa Kréditu Hanai Malu, Elizario Ferreira informa kooperativa kréditu hamutuk 90 ne’ebé hamahan-aan iha federasaun, iha tinan 2016 bele kontribui ona ba dezenvovimentu kreximentu nasionál porsentu 2.4.
Daudaun ne’e, Federasaun Hanai Malu iha ona faze atu prodús filafali kréditu ne’ebé distribui ba membru, kuaze 10 mil ona no osan ne’ebé sai atinje ona millaun U$3 ba ema 10 mil hahú husi janeiru to’o jullu 2017.
“Federasaun mós promove formasaun tuir job discription ba formasaun lideransa, training of trainers (ToT) ne’ebé preparadu no ami mós koopera ho institutu superiór Kristal no Universidade UNITAL, harii Departamentu Jestaun Kooperativa no parese iha fim do ano sei iha graduasaun ba ema na’in-15,” Elizario hatete iha Aitarak-Laran, ohin.
Estudante nain 15 ne’ebé mak sei gradua Elizario promete, sei ba direta serbisu iha kooperativa nune’e mós estudante nain 60 resin ne’ebé sei iha UNITAL bainhira ramata nia estudu automatikamente sai funsionariu ba federasaun kooperativa kréditu Hanai Malu.
Pozisaun servisu ba estudante sira ne’e sei okupa jestór nivel médiu atubele halo formasaun iha nivel koperativa no automátikamente prepara sira atu simu formasaun ne’ebé federasaun fasilita tuir servisu nian, no normalmente dirijente sira sei tuir formasaun lideransa no sira ne’ebé mak operasionál tuir formasaun iha área oioin ne’ebé mak iha modul 146 ne’ebé preparadu inklui formasaun ba auditoria no sistema espesífiku ba kooperativa kréditu sira atu halo análize ba relatóriu ne’ebé kooperativa prodús.
“Harii relasaun oioin no ami preparadu no instituisaun ami harii rejistadu ne’ebé bolu naran institutu sertifikasaun profisionál, ne’e sertifika ema ne’ebé serbisu iha kooperativa tenke hetan duni sertifikadu husi federasaun mak foin bele halo formasaun iha nivel baze,” Elizario subliña.
Kooperativa iha mahon federasaun ne’e eziste bazeia artigu 138 ne’ebé hatete, kooperativa hanesan setór ekonómiku no bazeia mós ba artigu 50, alinea 5 no artigu 59 bainhira iha relasaun ho edukasaun hanesan daudaun harii ona departamentu jestaun kooperativa iha institutu no universidade.
(Jornalista : Maria Auxiliadora)
(Editór : Manuel Pinto)
