DILI (TATOLI)—Padre Koléjiu Fatumaka Munisipiu Baucau, Eligio Locatelli, SDB, ohin, Kuarta (26/07) hakat án ba Palasio Governu hodi hasa’e lia agradesimentu ba Governu liu hosi Nai Primeiru Ministru Rui Maria de Araújo tan ajuda ona nia hodi harii sentru formasaun ba Joven no konventu ba madre sira iha Loilubu Baukau.
Primeiru Ministru fó sai katak, iha enkotru entre nia ho Pe. Eligio Locatelli, SDB, primeiru asunto mak Amu Padre hato’o agradesementu ba apoiú Sextu governu durante nia mandatu.
ʺAmo Locatelli mai agradese servisu hotu ne’ebé durante ne’e Governu fó apoiú liuhusi Gabinete apoiú sosiadade sivil iha eskola Fatumaka ho fatin balun ne’ebé Amo Locatelli halo hanesan servisu misionariu,ʺ Rui Maria de Araújo informa ba Jornalista sira iha Palasiu Governu ohin.
Iha sorumutu ne’e Amu Locatelli mós konivida Primeiru Ministru atu partisipa seremonia inagurasaun sentru formasaun ba Joven no konventu ba madre sira iha Loilubu Baucau iha loron 26 Agostu 2017. Basa obra ne’e harii lases hosi tulun governu nian liuhosi Gabinete apoiú fundu ba sosiadade sivíl no doadores sira ne’ebé tutela ba gabinete Primeiru Ministru nian.
“Padre Locatelli durante ne’e fó apoiú maka’as ba dezenvolvimento Timor-Leste liliu área edukasaun, Pastoral no sosiais,” PM Rui fó sasin.
Amu Eligio Locatelli SDB, Ema Italiano, moris iha Bretonvillers Franca iha loron 7 Fevereiro 1937, oan husi Attilio Locatelli no Fiorenzina Locatelli.
Pe. Eligio Locatelli, SDB, tama iha Timor-Leste iha fulan Outobru, 1964 hodi hela iha Colégio Fatumaka to’o ohin loron.
(Jornalista:Agapito dos Santos)
(Editór : Manuel Pinto)
