TURISKAI, (TATOLI) – Komunidade postu administrativu Turiskai, munísipiu Maunfahe, hetan tulun hosi Ministériu Solidariedade Sosiál (MSS) hamutuk ho Organizasaun Naun Govermentál Kadalak Sulimutu Institute (KSI), Luta Ba Futuru (LBF) inklui autoridade lokál realiza seremónia tara bandu, foin lalais ne’e.
Tara bandu nu’udar meius hametin unidade, hamenus konflitu no hasa’e dezenvolvimentu, tuir Diretór Jerál (DJ) MSS ba asuntu Protesaun Sosiál no Kombatentes Libertasaun Nasionál, Eugénio João A. de Maria Soares hateten seremónia rituál ne’e sei lori dezenvolvimentu no sei bele rezolve problema sosiais balun ne’ebé komunidade sira enfrenta.
“Tara-bandu ne’e atu fó moris di’ak ba ita, nune’e bainhira ita la kumpri ita nia obrigasaun, bandu sei tara fali ita, katak kastigu ita iha ita nia moris tuir mai”, dehan.
Iha fatin hanesan, Lia Nain, Afonso Sarmento hatutan tara-bandu ne’e halo tanba problema báziku ne’ebé komunidade Turiskai infrenta.
Tara-bandu halai liu ba buat importante tolu mak, bandu ba natureza, katak komunidade ida-idak tenke respeitu ai-horis sira, bee, rai lulik, no labele tesi ai arbiru, ne’ebé to’o ikus bele hamosu inundasaun.
Ida seluk mak halai liu ba relasaun entre ema ho ema, liu-liu liga ba violénsia seksuál, katak la bele deskonfia malu hanesan buan, abandona nia feen no oan sira, ikus liu mak relasaun entre ema ho animál.
Tara-bandu ne’e kuandu implementa didiak bele fó forsa ba autoridade ou lideransa komunitária sira, nune’e sira bele iha kbi’it atu foti desizaun ruma. Bainhira komunidade sira kontra regras, iha buat rua de’it mak sei halo, bainhira problema ne’e iha relasaun ho krime, sei la rezolve tuir de’it kultura, maibé sei rezolve tuir dalan legál, maibé ba problema sira ne’ebé mak halai liu ba kultura sei rezolve tuir kultura ninian.
Biban ne’e Lian Na’in husu atu komunidade tomak iha postu refere kumpri no halo tuir desizaun ka regulamentu ne’ebé iha ona konkordansia hamutuk, nune’e bele halo mudansa ba moris di’ak.
Partisipa iha seremónia tara ne’e mak Adjuntu Administradór Munisípiu Manufahi, Arantes Isac Sarmento, Diretóra Nasionál Prevensaun Konflitu Ministériu Interiór, Komandante PNTL Munisípiu Manufahi ho nia membru, F-FDTL, reprezentante igreja, Lia Nain hosi Suku 11, inklui komunidade. ki
