Uma-Kain 94% Hetan Ona Vizita Husi Pessoal Saúde

0
87
Primeiru Ministru, Rui Maria de Araújo

DILI (TATOLI)—Primeiru Ministru Rui Maria de Araújo, relata, durante tinan 2015 to’o ohin loron uma hamutuk 94% mak hetan ona vizita hosi pessoal saúde sira iha âmbito implementasaun programa saúde na família

“Dadus Nasionál hatudu maski Programa Saúde na Família foin hahú iha tinan 2015, maibé pesoál saúde hala’o duni vizita porsentu 94 kada uma-kain ka família no iha nível individuál rejista ona porsentu 84 husi totál dadus populasaun iha territóriu Timor-Leste,” Rui Maria de Araújo esplika bainhira lansa programa saúde na família iha forma livru no vídeo iha Side Event ba Konferénsia Objetivu Dezenvolvimentu Sustentavel, ohin iha Sentru Konvensaun Dili (CCD).

Programa saúde na família mak dalan intervensaun integradu ida atu garante saúde di’ak liu ba ema hotu iha Timor-Leste.

Iha loron 22 Jullu 2015, Governu, liuhusi Ministériu Saúde lansa programa saúde na família ne’ebé inklui atividade konjuta husi profesionál saúde sira hanesan médiku, enfermeiru, no parteira ne’ebé halo vizita domisiliária ka tama-sai uma-kain hotu iha rai-laran no uza instrumentu dispensarizasaun atu identifika no observa estadu  saúde individuál, família nian, ambiente no estratifika ka hafahe timoroan hotu tuir grupu kuidadu saúde.

Dezafiu ba implementasaun saúde na família, tuir PM Rui nia haree mak kuaze populasaun porsentu 70  hela iha área rurál ka iha área remota ne’ebé hela iha foho liu. Nune’e problema ida ne’ebé boot liu, parte husi asesibilidade mak menus informasaun, no timoroan barak lapreokupa ba sira-nia estatutu saúde ho ida ne’e presiza ekipa saúde na família atu la’o dook no hasoru dezafiu atu koko no atinje ema hotu.

“Labele husik ema balun iha kotuk no atinje primeiru sira ne’ebé hela ba kotuk, Rui Araújo realsa.

Programa saúde na família hahú hosi nia implementasaun to’o ohin loron hetan suporta husi Nasaun Unida, en partikularmente ajénsia WHO no UNICEF. Hein katak ho espíritu parseria  ne’e, ba implementasaun ODS iha Timor-Leste ba 2030, iha posibilidade ba Timor bele susesu rejistu ba família iha Timór laran tomak.

Polítika Governu

Saúde di’ak, esensial ba koalidade moris. Governu sei garante katak timoroan hotu bele hetan asesu ba kuidadus saúde, alimentus, nutritivus, bé mós no saniamentu ne’ebé di’ak.

Tuir dokumentus Programa V Governu konstitusionál nian, 2012-2017, ne’ebé VI governu kontinua haktuir katak, iha tinan lima oin mai, governu sei garante katak, sukus ho populasaun hosi ema 1.500 to’o 2.000, ne’ebé hela iha área remotas liu, sei hetan atendimentu hosi postu saúde no, atu atende populasoens hirak ne’e, sira sei lori pakote servisu boot ida ne’ebé inklui servisus kurativus bázikus, programa vasinasaun, kuidadus saúde materna no infantil, programas nutrisaun, akompañamentu ba tuberkuloze, kuidadu saúde mental, promosaun ba saúde no edukasaun kona-ba saúde.

Planu estratéjiku sector saúde nian, ba 2011-2030, iha médio ho longo prazo, sei buka dezenvolve rekursus úmanus ne’ebé presiza, atu nune’e suku sira, ho 2.000 habitantes ba leten, bele hetan ona médiku ida, enfermeiros rua, parteiras rua, tékniku laboratório ida ho tékniku farmasia ida.

(Jornalista: Maria Auxiliadora)

(Editór : Manuel Pinto)

HUSIK IDA HATÁN