ERMERA, 20 maiu 2019 (TATOLI)-Mezmu mosu krime ki’ikoan iha territóriu jurisdisaun Munisípiu Ermera nian, maibé Komandante Polisia Nasionál Timor-Leste (PNTL) Munisípiu Ermera, Superintendente Polisia Natércia Eufrásia S. Martins, garante situasaun seguransa jerálmente iha Ermera hakmatek.
Superintendente Polisia Natércia Eufrásia S. Martins, hatete, krime sira ki’ikoan ne’e iha Lei no prosedimentu. Polisia no autoridade lokál sira hala’o sira nia servisu, liuliu servisu ne’ebé lei fó kompeténsia atu rezolve iha nivel suku.
“Kada suku iha ona Ofisiál Polisia Suku (OPS) sira hotu, no mós iha suku balun ita forma ona ekipa KPK (Konsellu Polisiamentu Komunitáriu) kompostu hosi estrutura suku nia rasik aumenta ho OPS no mós lider sira hosi instituisaun relijioza nian reprezentante, veteranu no joven iha hotu laran”, Natércia afirma iha ámbitu komemorasaun loron restaurasaun independénsia ba da-17 iha kampu eis Pemda, Gleno, Segunda (20/5/2019).
Hosi ekipa ida ne’e, Natércia tenik, fó formasaun ba sira no sira maka hamutuk hodi identifika krime ne’ebé mosu iha bairru ka suku laran, depois sira haree no ida ne’ebé tuir lei bele fó kbiit ba sira atu rezolve maka solusiona iha nivel suku no ida ne’ebé labele no presiza refere ba Polisia atu halo prosesu tuir prosedimentu krime, sira sei entrega ba Polísia.
“Mas iha suku tau livru rua atu kontrola krime ka kualkér problema ne’ebé mosu. Krime iha livru ida tau natureza krime públiku no ida sivíl. Ida ne’e maka fó dalan ba sira atu bele buka solusaun kuandu vítima ne’e hakarak,” Natércia hatete.
Aléinde ne’e, Komandante Natércia dehan, iha munisípiu halo servisu parseria ne’ebé kompostu hosi Polísia, autoridade, Governu lokál, igreja, joven, veteranu, koordenadór lider partidu polítiku ne’ebé eziste iha Ermera.
“Ita iha ekipa ida ne’ebé forte, sempre bolu malu tuur hamutuk no buka solusaun kuandu ita hasoru situasaun balun ne’ebé tenke halo prevensaun, kuandu la halo prevensaun bele mosu krime, ezemplu, iha eleisaun jerál mai to’o eleisaun antesipada ho ita-nia servisu hamutuk hanesan ne’e, ita hasai paktu unidade ida ne’ebé asina hosi lider partidu polítiku, entaun sira hamosu kompromisu ida ne’ebé aas no sira fó apoia ba seguransa, tanba ne’e to’o agora laiha problema ida ne’ebé boot no mosu para fó impaktu ba seguransa ein jerál”.
Iha Ermera, parte seguransa sempre monitoriza no bainhira rona iha kestaun ruma halo kedan intervensaun.
Natércia ko’alia sobre dezafiu ne’ebé sempre hasoru iha servisu mak ho problema ba orsamentu ne’ebé tinan rua ikus ne’e hotu-hotu enfrenta no afeta mós instituisaun Polisia liuliu nia meiu apoiu hanesan transporte, fasilidade maka sai hanesan problema.
“Ita sempre enkoraja an para hasoru dezafiu sira ne’e, esforsu ho fali meiu saida ne’ebé la presiza ho sasán sira ne’ebé hanesan barreira ne’e ita halo hotu, tanba ne’e ita haree to’o ohin loron Ermera kontinua hakmatek”.
Komandante Natércia salienta, iha loron restaurasaun independénsia Timor-Leste nian ho tema “Haforsa Unidade no Garante Estabilidade atu hala’o dezenvolvimentu Nasionál” ida ne’e importante tebes no oinsá parte hotu ho unidade ne’ebé metin hodi identifika risku ka ameasa saida atu bele halo prevensaun hodi garante dezenvolvimentu ne’e bele la’o duni iha munisípiu, povu sira sente livre halo sira-nia atividade no goza sira-nia direitu ho liberdade iha ukun rasik-an ida ne’e.
Joven Ermera, Fidel Luis Belo, hatete iha kontestu pás iha fatin ne’e liuliu haree ba sosiedade nia situasaun, sira-nia movimentu, prinsipalmente iha Gleno hanesan kapitál munisípiu nian la’o normál.
“Husi janeiru mai to’o 20 maiu 2019 ne’e pás iha nafatin, pelumenus ema hotu iha ona preokupasaun ba sira-nia moris, ne’ebé ein jerál violénsia menus,” hatete Fidel Luis Belo.
Jornalista : Maria Auxiliadora
Editór : Francisco Simões
