LIKISA, (TATOLI) – Pilotu aviaun Aéru Dili ho tipu Cessna 172, númeru rejistu 4W-AAA, Hugo Mariano das Neves, haktuir aviaun monu tanba vintuña aviaun nakdoko maka’as rezulta aviaun mate-moris tanba laiha forsa.
Nia dehan sinál aviaun atu hetan dezastre ne’e akontese iha área munisípiu Likisa hafoin aviaun fila hosi Suai tula pasajeiru na’in ida.
“Bainhira ha’u tula pasajeiru na’in haat ba Suai ne’e ho kondisaun normál hela no fila mai mós normál hela maibé tama ona iha área Likisa maka foin vintuña nakadoko maka’as entaun pasiénsia tuun de’it ona”, Hugo ba jornalista Ajénsia Tatoli ho Rádiu Komunidade Tokodede Likisa iha fatin akontesementu, Aipelu, Suku Lauhata, Postu Administrativu Bazartete, Munisípiu Likisa, kuarta ne’e.
Hugo Neves hateten koko atu tuun iha rai mamuk iha Aipelu nian maibé ladi’ak entaun nia dulas fali ba estrada kona fiu eletrisidade to’o kotu maka aviaun foin para.
Hugo esplika bainhira akontese sinál, nia kontaktu kedas Autoridade Aviasaun Sivíl iha Dili katak vintuña nakdoko maka’as, tan ne’e imposível bele to’o Dili.
Fou-foun, nia hatutan hanoin atu tuun iha Maliana maibé labele tanba iha klaran ona no dook entaun nia desidi kontinua semo mai Dili ho distánsia metru 5000 hosi rai.
Maibé, Hugo afirma nia sente la trauma ho akontesementu ne’e tanba nia enfrenta ona esperiénsia hanesan ne’e iha Austrália.
“Ami treinu ona ba buat ne’e. Ha’u enfrenta ona esperiénsia moruk ne’e iha Austrália maibé iha Austrália ne’e aeruportu barak entaun akontese buat ruma bele tún hodi salva án no pasajeiru”, tenik.
Hugo hateten antes ne’e, kondisaun aviaun di’ak hela, tanba pasarevista tiha maka foin lori pasajeiru ba Suai no kondisaun klima mós di’ak tanba laiha abu-abu, udan no anin.
Entretantu, pasajeiru ho naran Aureo Moniz Cardoso, hateten ninia kondisaun di’ak hela maibé sente trauma tanba la espera asidente ne’e bele akontese.
“Nein kanek grave ruma iha ha’u nia isin lolon. Ha’u nia kondisaun saudável. Ha’u hanoin barak maibé buat hotu tuir Maromak nia planu”, dehan.
Hafoin akontesementu, autoridade saúde Likisa evakua kedas pilotu no pasajeiru ne’e ba ospitál referál Likisa hodi halo konsulta médiku no oras ne’e alta ona tanba la kanek.
Iha akontesementu refere, motorizada na’in rua mós hetan kanek kamaan tanba aviaun nia liras maka baku kois hafoin aviaun ne’e ros ba estrada.
Motorista na’in rua ne’e mai hosi Dili atu ba área Likisa Vila no oras ne’e vítima na’in rua alta ona hosi ospitál.
Kona-ba kauza hosi vintuña aviaun nakdoko, reprezentante Aviasaun Sivíl Nasionál ne’ebé lakohi temi ninia naran ba jornalista sira iha fatin akontesementu katak prosesu investigasaun ba dezastre ne’e sei la’o hela, tanba ne’e nia seidauk bele fó sai kauza hosi vintuña nakdoko.
Tuir observasaun jornalista Tatoli dadaun ne’e Polísia Munisípiu Likisa prepara hela karta entrega ba Autoridade Aviasaun Sivíl atu bele transporta aviaun ne’e ba Dili tanba dezastre refere akontese iha área jurisdisaun munisípiu Likisa.
Tuir planu, loraik ne’e parte Autoridade Aviasaun Sivíl sei transporta aviaun ne’e mai Dili. Aviaun ne’e ho kondisaun liras tutun parte liman loos no karuk tohar nomós roda sorin semo sai.
Aviaun ne’ebé ho kapasidade tula pasajeiru na’in haat ne’e la’ós pertense ba kompañia estatal maibé pertense ba kompañia privada ida. Aviaun refere monu iha tuku 09:17 ho pasajeiru na’in ida hamutuk ho pilotu.
Jornalista: Xisto Freitas
Editora: Rita Almeida
