DILI, 01 fevereiru 2023 (TATOLI)— Timor-Leste iha loron 20 abril 2023 ne’e, sei akontese Solar Eklipse (Gerhana matahari , sigla indonezia) ka loron nakukun total.
Ba akontesemente Solar Eklipse, Governu sei halo preprasaun másimu hodi simu vizitante sira hanesan, turista no sientista sira ne’ebé sei mai vizita Timor-Leste (TL) hodi partisipa akontesimentu natureza refere iha 20 abril 2023.
Diretór Jerál Turizmu iha Ministériu Turismu Komérsiu no Indústria (MTKI), Jelino Soares, hateten, tuir previzaun hosi siensista sira, akontesimentu loron matan nakukun total refere, sei akontese iha Timor-Leste hosi parte afeita barak liu iha Com, munisípiu Lautém to’o Beaco Viqueque.
“Tuir informasaun, sientista sira ne’ebé durante ne’e, sempre akompaña no estuda buka tuir akontese fonómenu ne’e hamutuk 50.000. Ne’ebé akontesimentu iha ita-nia rai tinan ne’e, fó oportunidade di’ak ba ita atu aproveita halo promoasaun ba ita-nia rikusoin iha rai-laran, tanba hosi númeru ne’e 50.000 barak mak sei mai vizita Timor-Leste nune’e ita mós sei halo esforsu másimu hodi simu sira,” Jelino Soares dehan ba Agência Tatoli, iha nia knaar-fatin, farol Dili, kuarta ne’e.
Nia dehan, preprasaun ne’ebé parte Governu nian sei halo mak atu haree oinsá simu turista sira, prepara fatin ba sira, no fahe informasaun ba komunidade tanba tuir informasaun bainhira akontese Solar Eklipse ne’e ema labele sai ba liur hateke tanba sei fó impaktu ba ema-nia matan.
Ida ne’e presiza servisu liña ministeriál hodi forma ekipa ne’ebé sei inklui Ministériu Saúde (MS), Ministériu Negósiu Estranjeiru no Kooperasaun (MNEK), Ministériu Adminitrasaun Estatál (MAE), Ministériu Koordenadór Asuntu Ekonómiku (MKAE) no parte MTKI sei prepara konseitu ida klaru lori ba Konsellu Ministru (KM) hodi bele hetan despaixu ofisiál ruma hosi Primeiru Ministru.
Nune’e ekipa liña ministeriál halo preprasaun di’ak ne’ebé simu sientista no turista ne’ebé mak sei mai vizita Timor-Leste.
“Antes akontese Solar Eklipse ne’e, turista no sientísta sira ne’e, mai antes ona, entaun ita presiza prepara fatin no halo atividade ruma hanesan, ko’alia ho komunidade hodi halo feira ruma prepara produtu lokál sira ne’ebé kualidade no ijene hodi atrai turista sira, ida ne’e mak agora ita iha preprasaun nia laran hotu no ita sei fahe informasaun ba komunidade,” nia dehan.
Kona-ba fasilidade públiku hanesan sanitária ka hariis-fatin no bee ekipa sei halo esforsu másimu nune’e turista sira mai bele fasilita sira.
Antes ne’e Prezidente Repúblika José Ramos Horta anúnsiu ona ba komunidade internasionál kona-bá Total Solar Eklipse iha Timor-Leste, no iha mundu akontese de’it iha rai balun. Tanba ne’e tuir previzaun katak sientista no turista barak mak sei vizita Timor-Leste.
“Ita hotu hatene tuir sientista sira akontesimentu total Solar Eklipse ne’e sei akontese kada tinan 145 mak foin akontese fali. Ida ne’e ita presiza halo preparasaun másimu,” nia dehan.
Jornalista : Arminda Fonseca
Editora : Armandina Moniz
