COVALIMA, 07 novembru 2022 (TATOLI)–Servisu Agrikultura Munisípiu Covalima (SAMC) liuhosi sentru manutensaun tratór hala’o programa hodi atende fila-rai gratuita ba agrikultór sira-nia to’os, tanba kompañia Mãe de Graça Unipesoál, Lda, distribui kombustível litru 5000.
“Ami atende ita-nia agrikultór sira mai tau naran atu fila sira-nia rai iha to’os ho kritéria sira lori foto kopia kartaun eleitorál, tanba kompañia Mãe de Graça Unipesoál, Lda, distribui kombustível litru 5000. Ho nune’e, hahú aban ba oin tratorista sira fila rai gratuita ba agrikultór sira-nia rai iha to’os laran,” Xefe Brigada Tratór, Tomas Amarál, informa ba Agência Tatoli, iha sentru manutensaun tratór Sanfuk, segunda ne’e.
Kompañia Mãe de Graça Unipesoál, Lda, distribui komvustível litru 5000 ne’e iha loron 28 fulan outubru tinan 2022 ne’ebé distribui mós ba postu admiistrativu sira hanesan Tilomar, Zumalai no Suai tanba sei uza durante semana tolu mak mina anee’e bele hotu.
“Kombustível durante silu batar la mai maibé antes finadu kompañia distribui ona kombustível atu fila-rai. Aban, ita fila-rai gratuita tanba tuir ami-nia esperiénsia 5000 litru ami sei distribui ba postu administrativu Tilomar, Zumalai no Suai,” nia dehan.
Kompañia Mãe de Graça Unipesoál, Lda, distribui kombustível litru 5000 sei uza durante semana rua, maibé atu tama semana tolu hotu ona nune’e sentru manutensaun tratór sei haruka relatóriu utliza kombustível ba kompañia no Ministériu Agrikultura no Peska (MAP). Nune’e, agrikultór sira la ense ona kombustível.
Tuir dadus, tratór iha sentru manutensaun Sanfuk hamutuk tratór unidade 30 no hosi númeru ne’e tratór unidade 11 mak avaria, tratór unidade 19 halo atendimentu ba agrikultór sira hodi fila-rai la sufisiénte, nune’e presiza atu aumenta tratór 20.
Sentru manutesaun tratór Covalima, kada loron atende agrikultór na’in-50 no hosi númeru ne’e bazea ba unidade tratór bainhira tratorista sira fila agrikultór sira-nia toos 50×50 bele to’o haat (4), no se agrikultór sira-nia toos ektare ida entaun loron-ida tomak, tratorista sira fila-rai toos ida de’it.
Jornalista : Celestina Teles
Editór : Cancio Ximenes
