DILI, 12 fevereiru 2024 (TATOLI) – Antigu Komisáriu Komisaun Anti-Korrupasaun, Sergio Hornai, sei simu posse hosi Prezidente Repúblika, José Ramos Horta, iha kinta-feira (15/02), hodi lori pasta Ministru Justisa.
“Ha’u simu ona kontatu hosi Kaza Sivil Prezidénsia Repúblika katak iha kinta (15/2) ne’e ha’u sei simu posse hosi Prezidente Repúbika hanesan Ministru Justisa foun hodi substitui señor matebian Amândio de Sá Benevides”, Hornai hateten ba jornalista TATOLI via telefone, ohin.
Hornai konta tuir katak hetan ona kontatu hosi Primeiru-Ministru Xanana Gusmão iha semana kotuk atu husu disponibilidade hodi asume kargu Ministru Justisa foun.
“Ha’u simu kontatu direta hosi Primeiru-Ministru hodi husu ha’u-nia disponibilidade hodi ka’er pasta hanesan Ministru Justisa iha IX Governu Konstitusionál”, nia haktuir.
Antigu Komisáriu CAC, esplika prosesu nomeasaun ba Ministru Justisa foun, proposta mai hosi Governu liuhosi Xefe Governu.
“Prosesu nomeasaun ne’e, proposta hosi Xefe Governu Xanana Gusmão mak propoen ha’u hanesan kandidatu Ministru Justisa foun no iha kinta ne’e konfirmadu ha’u sei simu posse hosi Prezidente Repúblika hodi ezerse funsaun Ministru Justisa foun”, nia adianta.
Hornai prontu ezerse funsaun hanesan Ministru Justisa, tanba hanesan ema profisionál durante tinan 24 servisu iha área justisa, prontu atu kontribui ba prosesu dezenvolvimentu nasionál bainhira hetan fiar hosi Governu.
“Nomeasaun ne’e laos oportunidade mabé ida ne’e hanesan responsabilidade bo’ot ba ha’u”, nia konklui.
Antes ne’e, Ministru Justisa Amândio de Sá Benevides mak asume kargu ministru maibé maromak bolu iha 20 janeiru, fulan kotuk, entaun Governu nomea fali Sergio Hornai hodi lori kargu referidu ministru.
Biografia badak (Sergio Hornai)
Nome : Sergio de Jesus Fernandes da Costa Hornai
Data Nasimentu : Lospalos, 21 Novembru 1974
Enderesu : Aimutin/ Comoro /Dili
Habitasaun Literária : Lisensiatura Direitu
Esperiénsia Traballu
Defensór Públiku desde ano 2000
Pozisaun : Defensór Públiku Jerál
Prezidente Konsellu Superiór Defensoria Públika Timor-Leste
Komisáriu CAC 2019
Atividade sira seluk :
Presidente da Associação estudante em Bali 1997-1999
Membro e Responsavel RENETIL 1994-1999
Partisipou curso Formacão/ Associação em Australia 2000
Partisipou curso Formacão em Lisboa,Portugal 2001
Formação Centro Juridicu Timor-Leste 2004-2017
Partisipou curso Aperfeicionamento material Direito e sivil
Membro Triagem PNTL Setembro 2016-2017
Membro Comissão Eleiçoes Nasional 2013.
Jornalista: Natalino Costa
Editór : Zezito Silva
