DILI, 30 jullu 2020 (TATOLI)-Sekretáriu Estadu na’in haat kompostu husi Sekretáriu Estadu Juventude no Desportu (SEJD), Sekretáriu Estadu Komunikasaun Sosiál (SECOMS-sigla portugés), Sekretáriu Estadu Igualdade no Inkluzaun (SEII), no Sekretáriu Estadu Arte no Kultura, kinta ne’e hahú halo diskusaun ba orientasaun Primeiru-Ministru, Taur Matan Ruak, atu dezena programa ruma hodi implementa iha suku sira iha territóriu Timor-Leste.
“Ohin ne’e reuniaun koordenasaun ida entre Sekretáriu Estadu na’in haat atu haree programa ida atu monta servisu iha Suku VIII, Primeiru Ministru orienta ida ne’e entaun ohin ami komesa halo koordenasaun ida para oinsá dezena programa no implementasaun programa,” informa Sekretáriu Estadu, Abrão Saldanha, ba Tatoli iha edifísiu SEJD Lecidere Dili.
Kada Sekretáriu Estadu ho ninia programa rasik, husi parte SECOMS sei implementa programa kona-ba publikasaun informasaun ba atividade Governu nian hodi hakbesik servisu Governu ba povu no buka solusaun ba problema ne’ebé povu enfrenta.
Husi Parte SEAK no SEII nian maka oinsá atu dezenvolve kapasidade joven, feto no grupu tradisionál kulturál iha baze.
Nia dehan, SEJD nian maka oinsá fó atensaun ba Sentru Juventude ne’ebé estabelese iha área rurál para akumula joven sira hodi partisipa iha programa Governu nian.
“Daudauk ne’e sei la’o hela ho orsamentu duodesimu ho nune’e seidauk bele realiza maibé ekipa tékniku ida sei halo servisu ba ideia ne’ebé Governu hasai nune’e bele tau iha orsamentu 2021 nian,”tenik Abrão.
Jornalista : Hortencio Sanchez
Editór : Agapito dos Santos
