DILI, 29 agostu 2019 (TATOLI)-Ministru Obra Públika no Abitasaun, Mochamad Basuki Hadimuljono, ne’ebé reprezenta Prezidente Repúblika Indonézia, Joko Widodo, hatete Governu Indonézia agradese tebes ba Governu no povu Timor-Leste ne’ebé tau ponte ida ho naran eis Prezidente B.J. Habibie.
“Ami fiar katak ponte B.J. Habibie ne’e la’ós de’it fasilita movimentasaun tránzitu, maibé ponte ne’e fó valór no istória atu povu entre Indonézia no Timor-Leste hametin kooperasaun ba futuru ne’ebé di’ak”, Ministru Indonéziu ne’e afirma iha ámbitu inaugurasaun Ponte B.J. Habibie iha Bidau Santa Ana, ohin.
Ministru Mochamad Basuki Hadimuljono hatete Estadu Indonézia liuliu Prezidente Repúblika Joko Widodo agradese tebes Governu no povu Timor-Leste hodi fó naran ba ponte ne’e.
“B.J. Habibie mós agradese no kontente tebes ho povu no Governu, Estadu, hodi tau nia naran”, haktuir nia.
Nia dehan, Estadu Indonézia kompromete kontinua apoia dezenvolvimentu Timor-Leste liuliu ba setór infraesturutra, sosiál no ekonómiku, prisipalmente kapasita rekursu umanu.
Iha fatin hanesan, Premiadu Nobel Dame nian, Ramos Horta, dehan inaugurasaun ponte Bidau Santa Ana ho naran B.J. Habibie ne’e hatudu katak Xanana Gusmão nia vizaun boot ba mundu no Timor-Leste atu hametin kooperasaun ho Indonézia.
“Prezidente B.J. Habibie nia kontribuisaun boot tebes tanba kuandu la halo desizaun atu loke forsa internasionál mai iha Timor-Leste, atu loke dalan ba povu deside liu dalan demokrasia entaun laiha dalan ba ukun rasik aan”, relata eis Prezidente Repúblika ne’e.
“Tanba ne’e ita halo ponte ne’e tau nia naran B.J. Habibie atu rekoñese mós nia kontribuisaun ba Timor-Leste nia independénsia”.
Iha fatin hanesan, Ministru Obra Públika, Salvadór Eugénio Soares dos Reis Pires, fiar katak liuhusi inaugurasaun ponte ne’e hodi hametin amizade entre estadu no populasaun Timor-Leste no Indonézia.
“Ha’u fiar katak ponte B.J. Habibie ne’e iha funsaun importante tebes atu fó kontribuisaun ba kooperasaun entre nasaun rua iha futuru ne’ebé di’ak liutan”, katak nia.
Ministru Salvadór dehan ponte fó naran eis Prezidente Repúblika Indonézia B.J. Habibie atu fó rekoñesimentu no hametin kooperasaun Indonézia no Timor-Leste iha Ázia Pasífika da ne’e.
Ponte ne’e inaugura husi Premiadu Nobel Dame nian, José Ramos Horta, reprezentante Prezidente Repúblika Indonézia Joko Widodo, Ministru Obra Públika no Dezenvolvimentu Urbana, Mochamad Basuki Hadimuljono.
Partisipa iha inaugurasaun ponte ne’e, reprezentante ONU no Eis Xefe UNAMET, Ian Martin no delegasaun, Primeiru-Ministru Repúblika Vanuatu, no bainaka espesiál sira, elenku governamentál Timor-Leste, membru Parlamentu Nasionál, Xefe Negosiasaun Fronteira Marítima Xanana Gusmão, Komandante F-FDTL no PNTL , Prezidente Autoridade Munisípiu, Postu to’o Suku inklui populasaun sira iha suku Bidau Santa Ana.
Projetu konstrusaun ponte ne’e ka’er husi kompañia Bakti Kharya Timor-Leste, Lda ho númeru kontratu S55/122/MOPTC, 2017, ho durasaun hahú 31 agostu 2017 too 31 agostu 2018 ho kustu $3,963.319,62 ho nia luan metru 10,5 no naruk metru 78 no tuir kontratu kompañia sei kontinua halo manutensaun hahú husi loron inaugurasaun nian to’o fulan neen.
Jornalista : Florencio Miranda Ximenes
Editora : Maria Auxiliadora
