DILI, 30 agostu 2021 (TATOLI)—Polísia Nasionál Timor-Leste (PNTL), munisípiu Dili liu hosi pasa revista iha sidade, haruka fila ema ne’ebé halo movimentu ho motór no karreta laiha nesesidade urjente.
Pasa revista ne’e Polísia hala’o iha fatin haat (4) iha Dili mak hanesan rotunda Prezidente Nicolau Lobato, Comoro no seluk tan.
Notísia relevante:Governu aplika hikas konfinamentu domisilariu iha Dili hahú 27 agostu
Ekipa konjunta ne’e kompostu hosi Komandu munisípiu Dili, Unidade Tránzitu, Unidade Espesiál Polísia (UEP), Polísia eskuadra-sira hodi aproveita halo mós sensibilizasaun kona-bá regra konfinamentu domisiliáriu jerál iha Estadu emerjénsia.
Segundu Komandante PNTL, munisípiu Dili, Superintendente, João Belo Sanches, hateten PNTL sei kontinua hala’o operasaun bazeia ba implementasaun rezolusaun Governu kona-bá konfinamentu domisiliáriu jerál, atu husu komunidade kontribui ba prevensaun transmisaun COVID-19.
“Sidadaun ne’ebé la’o laiha nesesidade urjente ita haruka fila ba uma,” João Belo Sanches, hateten ba jornalista-sira iha rotunda, Comoro, segunda ne’e.
Polisia autoriza de’it maka, sira ne’ebé la’o tanba nesesidade urjente hanesan sosa nesesidade bázika, sosa aimoruk, sosa pulsa eletrisidade no ba ospitál.
Polísia mós fó hanoin katak, bainhira la’o sai hosi uma tenke uza máskra, fase liman bebe’ik ho sabaun no mantein distánsia sosiál.
Iha operasaun ne’ebé hala’o iha rotunda Comoro, Polísia mós halo apreensaun ba motór hamtuk 12 ne’ebé la utiliza xapa matríkula ho espellu.
Governu iha liu hosi Konsellu Ministru prodús ona projetu rezolusaun Governu iha kuarta 25 agostu, ne’ebé deside aplika hikas konfinamentu domisiliáriu jerál ba populasaun iha Dili, entre tuku 00:00 loron 27 agostu to’o tuku 23:59 loron 02 setembru 2021.
Hosi projetu rezolusaun ne’e sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.
Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha serimónia ne’e.
Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.
Restaurante-sira bele fornese hahán, aplika rejime take away ka entrega iha uma de’it no estabelesimentu seluk taka ba públiku bele dezenvolve ninia atividade liuhosi serbisu entrega ba uma de’it.
Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.
Jornalista: Nelson de Sousa
Editór: Cipriano Colo
