DILI, 9 maiu 2019 (TATOLI)—Konsellu Imprensa Timor-Leste (CI-TL, sigla portugés), ohin, organiza konferénsia internasionál Dili Diálog Forum ba daruak ho tema prinsipál “Social Media: Challenges in The Modern Society”.
Intensaun boot liu hosi Dili Diálogu Forum ne’e oinsá maka estabelese mekanizmu ida ba konsellu imprensa iha Ázia Pasífiku atu fahe esperiénsia no halo kooperasaun para bele tau matan di’ak liu-tan ba liberdade imprensa ho liberdade espresaun.
“Tinan ida ne’e tema ba liu mídia sosiál tanba ita haree tinan rua ikus ne’e ita-nia jornalista profisionál sira hetan ameasa boot hosi mídia sosiál. Sé maka lais liu, ema hetan ida ne’e. Dalaruma ita mídia mainstream ida ne’e hetan kompetisaun boot tanba plataforma mídia sosiál barak lahalimar no ema hotu-hotu tau informasaun iha ne’ebá,” dehan Konsileiru Konsellu Imprensa ba asuntu Dezenvolvimentu Mídia, Hugo Fernandes, ba jornalista liuhusi entrevista ne’ebé halao hafoin abertura ba Dili Diálogu Forum iha salaun São José, Katedrál, Dili, kinta (9/5/2019).
Nia hatutan, jornalista sira ne’ebé mak serbisu iha mídia profisionál sai preokupasaun no públiku atu hetan informasaun ida ne’ebé kredível ne’e mak ida ne’ebé loos. Ida ne’e sai kompetisaun boot tanba mídia sosiál bele bele lori ameasa, tanba informasaun sira ne’e la liu hosi mekanizmu jurnalístiku ida ne’ebé di’ak.
“Entaun, laiha karik klarifikasaun. Laiha cover both side (balansu). Laiha étika ida ne’ebé hakerek ida ne’e, tan ne’e sai ameasa boot ba ita-nia sosiedade rasik. Relasiona ho kestaun ne’e maka ami foti asuntu ne’e nu’udar tema ba tinan ida ne’e,” nia hateten.
Hugo informa, ameasa mídia sosiál ida ne’e la’ós sai de’it Timor-Leste nia preokupasaun maibé kuaze iha rejiaun ida ne’ebé boot iha mundu tomak.
Atu regula mídia sosiál iha Timor-Leste, nia hatutan, iha tinan kotuk konsellu imprensa halo ona nota intendimentu ida ho Autoridade Nasionál Komunikasaun (ANC-sigla portugés) tanba ANC maka fó lisensa ba operadór telekomunikasaun sira.
“Mídia sosiál sira uza plataforma ne’ebé maka kompañia operadór telekomunikasaun sira fornese. Proseu la’o hela. Hosi ANC halo ona. Ema hotu-hotu tenke rejistu sim card para depois aban bainrua bele tracking. Iha ne’e, sira sei hatene, sé maka lansa hoax ka fake news (informasaun falsu),” nia esplika.
Aleinde ida ne’e, nia informa, Konsellu Imprensa mós lansa tiha ona matadalan ba mídia online ne’ebé profisionál. Agora, nia hatutan, konteúdu hosi mídia sosiál ne’e maka tenke hamosu lei ida kona-ba IT (information technology). Atu halo lei IT ne’e, tuir nia, tenke konsulta kle’an ba parte hotu-hotu para fake news ne’e labele impede fali ema-nia liberdade espresaun.
Jornalista: Cancio Ximenes
Editór: Xisto Freitas
