DILI, 20 jullu 2022 (TATOLI)—Jestór Merkadu Manleuana Dili, Julio Barros Caldas, hateten merkadu Manleuana daudaun ne’e la sufisiente atu akumula negosiante sira-ne’ebé faan sasán iha estrada públiku Elemloi, merkadu Comoro no Kampung Baru ne’e muda ba fatin refere.
Notísia Relevante: AMD sei muda negosiante faan iha estrada públiku ba merkadu Manleuana
“Ha’u hanesan Jestór Merkadu Manleuana, tuir ha’u-nia observasaun iha merkadu Manleuana fatin ba produtu lokál agora daudaun kuaze nakonu ona. Tanba, uluk fatin balkaun sira-ne’ebé mamuk ha’u hatama ona vendedór produtu lokál ba ona iha balkaun sira-ne’e. Ne’ebé, atu akumula maioria maluk sira-ne’ebé agora faan hela iha estrada públiku ne’ebá, ha’u sente la sufisiente,” Julio Barros Caldas, hateten ba Ajénsia Tatoli, iha nia knar fatin, Merkadu Manleuana, Díli, kuarta ne’e.
Tanba, nia informa, fatin iha merkadu manleuana daudaun ne’e sei hela uma neen mak sei mamuk, ne’ebé ida-ne’e la to’o no bele akumula de’it negosiante 50. Maibé atu akumula negosiante hosi Kampung Baru, Elemloi no Merkadu Comoro, fatin ne’e labele akumula ema barak.
Parte merkadu Comoro, foin daudaun nia parte hetan ona informasaun hosi Dirasaun Merkadu katak iha negosiante 41 mak atu mai iha merkadu Manleuna, ida ne’e bele sufisiente maibé atu akumula negosiante sira iha Elemloi, Kampung Baru no liu-liu maluk sira ne’ebé okupa hela iha estrada públiku, ida ne’e sente la sufiente tanba fatin ne’e limitadu.
“Ha’u identifika ona fatin ne’ebé mamuk kona-ba produtu lokál iha ne’e 50 de’it, ne’ebé ita bele simu tan de’it negosiante 50, maibé liu ida-ne’e labele,” nia dehan.
Maske nune’e, nia dehan negosiante sira-ne’ebé muda ona ba balkaun iha merkadu laran, daudaun ne’e ladún hetan rendimentu tanba ema ladún asesu ba iha merkadu laran.
“Ita-nia negosiante barak mak mengeluh hela, iha fatin kotuk ne’ebá ema ladún tama, tanba buat ida prosesu mudansa mak hanesan ne’e, maibé ha’u fiar katak ba oin sei di’ak,” nia dehan.
Merkadu manleuana hakarak atu sai rame ho movimentu di’ak, Governu tenke hapara negosiante faan iha Elemloi tanba ema atu asesu mai merkadu Manleuana ne’e, kuandu Elemloi loke hela ne’e entaun ema labele tama mai merkadu.
“Nia xave mak ne’e, Elemloi kuandu mamuk, entaun ema bele mai hola sasán iha merkadu Manleuana ne;e,” nia dehan.
Prezidente Autoridade Munisípiu (PAM) Dili, Guilhermina Filomena Saldanha Ribeiro “MARGI” hateten, fatin iha merkadu Manleuana atu to’o ka la to’o ne’e, orientasaun tun ba ne’e jestór merkadu sira tenke ezekuta.
“Ne’ebé presiza aruma, ita atu akomoda no ita atu besik malu responsabilidade tenka hadi’a no tenke halo buat ruma, se la akomoda ita atu ba ne’ebé, entaun espasu ruma tenke halo. Tanba ne’e, sira (Jestór Merkadu) tenke ezuta de’it orden ne’ebé ha’u hato’o ba sira,” nia dehan.
Entretantu, tuir informasaun hosi Jestór Merkadu Manleuana, Julio Baroos, katak uma ba negosiante sira halo atividade negósiu produtu lokál iha Merkadu Manleuana hamutuk 24 no hosi númeru ne’e negosiante sira uza ona 18, falta uma neen (6) mak sei mamuk hela.
Enkuantu, totál negosiante ne’ebé daudaun halo atividade negosiu iha Merkadu Manleuana hamutuk 849 no hosi númeru ne’e faan produtu lokál, nesesdidade bázika, obralan, roupa foun, ai-funan, manu moris, naan karau no fahi, loke restaurante no seluk tan.
Jornalista : Nelia Fernandes
Editór : Cancio Ximenes
