DILI, 20 fevereiru 2020 (TATOLI) – Mellor estudante na’in-tolu husi Kursu Promosaun Superiór dahaat, aprezenta Traballu Investigasaun Sientífiku iha konferénsia ne’ebé realiza husi Institutu Defeza Naionál (IDN).
Estudante na’in-tolu kompostu husi Kapitaun Sulustiano de Vasconselos, lori tema “o reforço da Componente Terrestre com vista a sua modernização”, Primeiru Tanente do Mar, Duarte Borges Loe, lori tema “reforçar a segurança maritima no âmbitu do desenvolvimento da economia sustentável”, no Inspektór Xefe Agostinus Baliadas hosi Polísia Nasionál Timor-Leste (PNTL), lori tema “o papel da PNTL na aplicação da lei para prevenir e atuar perante atus de perturbação da ordem pública”.
Diretór IDN, Donaciano Costa Gomes ‘Pedro Klamar Fuik’, hateten konferénsia ne’e, IDN rasik maka organiza hodi apresenta matéria espisífiku iha kursu promosaun superiór dahaat, ne’ebé alunu husi institutu ne’e rasik mak aprezenta.
“Konferénsia ne’e halo apresentasaun kona-ba Traballu Investigasaun Sientífiku ba alunu sira ne’ebé maka tuir ona kursu promosaun superiór durante tinan-ida iha IDN no bainhira sira konklui kursu promosaun durante tinan-ida, ita bele komprensa sira na’in-tolu ba konseitu estratéjiku”, tenik Pedro Klamar hafoin ramata konferénsia ho tema “consolida a estrategia da segurança nacional que vise garantir o desenvolvimento de Timor-Leste”, iha salaun IDN, Palásiu Governu, kinta ne’e.
Husi temátika tolu ne’ebé aprezenta, bele tulun alunu sira kompreende Traballu Investigasaun Sientífiku di’ak liután.
“Ida-ne’e ajuda ona sira hodi hatene kle’an kona-ba konseitu estratéjika defeza no seguransa nian, tanba bele konstitui memória liga ba kestaun kona-ba seguransa no defeza nian”, nia dehan.
Tuir Pedro, durante kursu tinan-ida iha IDN, matéria halai liu ba seguransa no defeza no seluk kona-ba disiplina.
“Husi temátika sira-ne’e, ita bele sukat ona sira nia prespetiva liga ba asuntu defeza no seguransa. Ba ofisiál foun sira hafoin kursu promosaun superiór, sira bele aprezenta mai ita kona-ba konseitu estratejia defeza no seguransa atu hatudu sira nia kompreensaun to’o ne’ebé”, nia dehan tan.
Ho nune’e, superiór F-FDTL no PNTL na’in-tolu bele hatene ona saida maka sira atu halo iha servisu durante ne’e.
“Ha’u hanoin hafoin kursu ida-ne’e sira bele ba implemeta iha sira nian institusaun idaidak nian, hanesan komponente saida maka durante-ne’e sira aprende bainhira sira komanda iha sira-nian unidade idaidak no planeamentu saida maka bele halo bainhira iha sira-nian unidade iha institusaun F-FDTL no PNTL rasik”dehan Pedro Klamar Fuik.
Iha kursu promosaun superiór, alunu sira mai hosi superiór F-FDTL no PNTL ho deviza boot.
Iha fatin hanesan, estudante IDN Kapitão Sulustiano Vasconselos, konsidera Timor-Leste presiza halo modernizasaun iha forsa komponete terrestre tanba nu’udae pilár importante ba nasaun rasik.
Nia realsa, dezenvolvimentu setór defeza, liuliu iha área komponente terrestre presiza halo optimizasau no modernizasaun, nune’e ba futuru sai forsa armada ne’ebé profisionál bainhira halo servisu.
Alunu na’in-tolu nu’udar mellor alunu entre alunu na’in-37 iha kursu promosaun superiór dahaat, ne’ebé realiza husi IDN iha tinan-2019.
Enkuantu alunu ne’ebé maka tuir kursu promosaun superiór iha IDN hamutuk na’in-40, maibé na’in-37 maka konsege konklui kursu refere no na’in-tolu seluk la konsege konklui kursu refere tanba kestaun saúde.
Jornalista: Natalino Costa
Editora: Julia Chatarina
