DILI, (TATOLI) – Embaixadora Timor-Leste ba Portugal, España no Kabuverde, Maria Paixão, hato’o relatóriu ba Prezidente Repúblika, Francisco Guterres Lú Olo, tanba ramata ona misaun diplomata.
“Ha’u hanesan reprezentante Prezidente Repúblika ninian iha nasaun tolu hanesan Portugal, España no Kabuverde mai hato’o ba Xefe Estadu katak ha’u nia misaun ramata ona”, dehan nia ba jornalista sira iha Palásiu Prezidente Nicolau Lobato, Bairru Pité, tersa ne’e hafoin enkontru ho Xefe Estadu.
Nia hatutan: “Ha’u tenke mai fali fó ha’u nia relatóriu ba Xefe Estadu no agradese konfiansa ne’ebé Prezidente fó ba ha’u durante tinan haat, fulan sanulu”.
Eis-deputada ne’e haktuir atividade ne’ebé halo durante ne’e la’ós de’it iha embaixada tolu, maibé tinan ida ikus hala’o mós funsaun hanesan embaixadora ba UNESCO (Organizasaun Nasaun Unida ba Edukasaun, Siénsia no Kultura) no sente katak hala’o misaun ho di’ak.
Paixão haktuir serbisu ne’ebé halo durante mandatu maka hametin relasaun entre TL ho Portugal, España no Kabuverde.
“Iha problema ruma ami buka atu rezolve no iha sidadaun ruma ne’ebé maka ba ne’ebá la konsege halo sira nia vistu tuir porsedimentu Portugal ninian, ne’e mós ami rezolve”, dehan.
Hatutan tan: “Iha mós timoroan balun ne’ebé maka komete krime iha Inglaterra, Irlanda no halo deportasaun mai iha Portugal, ami tenta ajuda atu kondús sira mai fali iha Timor”, esplika.
Alende ne’e nia dehan fó apoiu másimu ba estudante timoroan sira ne’ebé dala barak atrazu ba bolsa.
Jornalista: Xisto Freitas
Editora: Rita Almeida
