DILI, 05 jullu, 2019 (TATOLI)— Komisaun Justisa no Pás, Dioseze Dili, Baucau ho Maliana, dezeña ona programa debate nasionál ida ho naran Timor-Leste Voice of The Voiceless, ne’ebé tuir planu sei lansa iha loron 3 fulan Augusto, tinan ne’e, iha Salaun Katedrál, Dili.
Portavós ekipa komisaun organizadora ba programa ne’e, Padre Júlio Crispim Belo esplika, papél importante ida husi Igreja Katólika atu defende no promove ema sira ne’ebé lian la to’o iha ema barak, liu-liu ema kompetente sira nia tilun, atu bele influensia desizaun sira ho adekuada no justa, korresponde ho objetivu estadu no Igreja Katólika.
Amu Crispim hatutan, konteúdu husi programa ne’e reflete hikas istória pasadu TL hahú husi tempu okupasaun, ema barak laiha lian, no úniku Igreja Katólika maka halo ema hirak iha lian hamutuk ho movimentu da luta too prosesu ne’e hotu.
Tama too tempu ukun aan, Amu Júlio Crispim Belo salienta, papél Igreja Katólika hodi hato’o sira ne’e ne’ebé lian laiha, ba governu oinsá hataan ba dezenvolvimentu nasionál.
Ba Ajénsia TATOLI, ohin, iha Dili, Amu Júlio Crispim Belo, informa, atividade Voice of The Voiceless ne’e atu komemora mós aniversáriu ezisténsia Komisaun Justisa no Pas Dioseze Dili ba dala-XXV no komemora tinan 20 loron konsulta populár (30 Augusto 1999-30 Augusto 2019).
Porta voz ne’e hatutan, atividade ne’e konsidera hanesan atividade nasionál, ne’ebé sei enkuadra iha Komisaun Justisa no Pás nasionál ne’ebé tuir planu sei estabelese iha fulan Dezembru, tinan ne’e, bazeia ba desizaun husi Konferénsia Episkopál Timorense.
Programa ne’e rasik, sei hala’o debate públiku ne’ebé sei halo tranzmisaun direta husi média nasionál sira, envolve husi entidade oioin, hanesan polítiku, akadémiku, sosiedade sivíl, estudante, feto no seluk tan.
Asuntu debate mós oioin hanesan étiku, sidadania, polítika, ekonomia, seguransa, kultura, sosiál, no seluk tan.
Husi debate ne’e, tenik Amu Júlio Crispim Belo, atu buka oinsá hetan ideia di’ak ruma ne’ebé mosu, no hetan lian ida ne’ebé bele hafanu no bolu atensaun ba órgaun kompetente, liga ho asuntu dezenvolvimentu nasionál.
Tuir planu, programa ne’e rasik sei hala’o fazeadamente ne’ebé sei hahú iha fulan Augustu too Dezembru tinan ne’e, fulan ida sei hala’o debate dala ida.
Oras ne’e daudaun ekipa instaladora hala’o hela preparasaun ba konteúdu tomak, liuliu ninia realizasaun no hetan ona apresiasaun husi entidade oioin.
Kona ba orsamentu ba programa ne’e, Amu Crispim hateten, iha ona fundus própriu no komisaun organizadora sei kontinua buka fundus atu bele realiza di’ak liu tan programa ne’e.
Responsavel prinsipál ba programa ne’e maka diretór Komisaun Justisa no Pás Dioseze Dili, Padre Hermínio Gonsalves ho membru sira hamutuk na’in 16.
Komisaun organizadora mós sei konvida na’i ulun sira husi órgaun soberania haat, lider nasionál sira, veteranu, membru governu, membru parlamentu, akadémiku, sosiedade sivíl, estudante no seluk tan.
Jornalista : Cipriano Colo
Editór : Francisco Simões
