BAUCAU, 20 abríl 2022 (TATOLI) – Prosesu apuramentu munisípiu Baucau hatudu katak kandidatu Prezidente Repúblika númeru sorteiu rua, Francisco Guterres ‘Lú Olo’ manán iha munisípiu Baucau ho totál votu 45.985 (66,45) hosi totál eleitór 69.952 (98,93).
Prosesu apuramentu iha Sekretariadu Tékniku Administrasaun Eleitorál (STAE) munisípiu hala’o iha loron tersa, 19 abríl, purvolta tuku 19:00 no finaliaza iha loron kuarta, 20 abríl iha oras 03:00 ne’ebé hetan partisipasaun másima hosi fiskál no observadór sira.
Dadus hosi STAE Baucau hosi totál akta hamutuk 125 ne’ebé hosi sentru votasun iha postu Baucau vila hamutuk 32, Baguia 22, Quelicai 28, Venilale 16, Laga 16 no kiik-liu sentru votasaun 11.
Nune’e, apuramentu munisípiu Baucau iha eleisaun prezidensiál volta daruak Francisco Guterres ‘Lú Olo’ manán iha munisípiu Baucau ho totál votu 45.985 (66,45) no kandidatu Prezidente Repúblika númeru sorteiu 1, José Ramos Horta okupa segundu lugár ho totál votu 23.217 (33,55).
Entertantu totál eleitór ne’ebé ezerse direitu votu iha eleisaun prezidensiál iha Baucau hamutuk na’in-69.952 ho taxa partisipasaun 73,09% hosi totál lista votante 95.708, kompostu hosi votu nulu 524 (0,75%), reklamasaun 25 (0,04%), rezeitadu ida, abandonadu sia (0,01), branku 191 (0,27%) no totál votu válidu hamutuk 69.202 (98,93).
Jornalista : Natalino Belo
Editór : Evaristo Soares Martins