DILI, 12 dezembru 2022 (TATOLI) – Labarik hamutuk 1.074 iha postu administrativu lima suku 11, munisípiu Dili, partisipa ona programa eskola iha uma ne’ebé realiza hosi Ministériu Edukasaun, Juventude no Desportu (MEJD).
Diretór Nasional Edukasaun Pre-eskolár, Tomás do Rosário, fó-sai katak, labarik 1.074 hosi sentru 36 hala’o ona sira-nia prosesu ensinu aprendizajen normál tuir planu no programa ne’ebé trasa ona no hetan apoia másimu hosi programa HANS ne’ebé apoiu hosi governu Nova Zelándia liuhosi ninia embaixada iha Timor-Leste.
“Programa ne’e kategoria pilotu maibé matéria ne’ebé hanorin ba labarik sira-ne’e laloos pilotu. Ne’e matéria ida-ne’ebé foti hosi matéria kurrikulár ne’ebé hanorin iha edukasaun pre eskolár iha territóriu nasionál,” Tomás do Rosário informa asuntu ne’e ba Tatoli liuhosi telefónika, segunda ne’e.
Nia haktuir, programa eskola iha uma ne’e ninia konteúdu diferensa ho maneira sira-ne’ebé hanorin iha edukasaun pre-eskolár formál sira, matéria eskola iha uma ne’e iha mós televizaun no ko’alia hodi rona múzika inklui grava ona matéria sira atu atrai labarik sira badinas aprende liután.
Xefe aldeia Belavista, suku Lahane Osidentál, Alexandrina Mendonça, sente kontente tanba governu Ministériu Edukasaun bele kria programa foun ida-ne’ebé di’ak tebes hodi lori edukasaun besik liután ba komunidade sira iha suku no aldeia.
Nu’udar autoridade lokál husu nafatin atu programa ne’e labele para de’it iha ne’e, sé bele buka hakas-aan ba atu kontinua hatutan nafatin iha tinan oin.
Tanba hosi aldeia Belavista de’it totál labarik sira-ne’ebé maka partisipa eskola iha uma ne’e hosi inísiu hamutuk 20 maibé agora sa’e ona ba 40. Ne’ebé fahe ba grupu rua hosi tinan 3 to’o 4 depois tinan 5-7 grupu ida.
Jornalista: Tomé Amado
Editór: Evaristo Soares Martins
