LIQUIÇA, 15 abríl 2021 (TATOLI)–Komunidade aldeia-tolu iha Suku Vaviquinia, Postu Administrativu Maubara, Munisípiu Liquiça, preokupa ho situasaun no kondisaun Mota Morae tanba bainhira udan-boot bele lori bee tama to’o sira-nia horik-fatin.
Aldeia tolu ne’e maka hanesan Aldeia Morae, Klesuhati ho Datlala, ne’ebé jeografikamente besik loos ho Mota Morae.
Xefe Suku Vaviquinia, Alcino Nunes, informa iha tempu liubá mota-ne’e sobu ona komunidade nia uma. Nune’e iha tempu agora bele fó risku ho tan atividade kampaña China Harbour Lda nian, ne’ebé kee hela fatuk iha mota ninin.
“Komunidade iha aldeia tolu-ne’e, uluk iha tempu bailoron mota-ne’e sobu ona, maibé agora kompañia Harbour mai sobu fali fatuk iha mota-laran no mota-ninin sira fó risku tebes no udan-boot mota mai agora dudu tama ba komunidade sira-nia uma,” Xefe Suku Alcino Nunes, hateten ba Agência Tatoli iha Maubara, kinta ne’e.
Nia dehan, bainhira loron dahuluk kompañia tama halo servisu nia parte hamutuk ho Xefe Aldeia halo ona intervensaun tanba laiha koñesimentu ba Konsellu Suku no lia-nain sira iha parte ne’ebá. Maibé, ikus mai kompañia aprezenta lisensa ambientál nian no autorizasaun hosi Administradór Munisípiu Liquiça.
“Lisensa ne’e ami haree ona katak fatuk-sira foti ne’e iha Guguleur la’ós Vaviquinia no husu ba parte kompetente atu haree lalais ba kestaun ne’e,” Alcino Nunes hateten.
Iha sorin seluk, Administradór Munisípiu Liquiça, Domingos da Conceição dos Santos, klarifika katak kompañia iha direitu atu foti fatuk sira-ne’e tanba hetan lisensa hosi Ministériu Rekursu Naturaís.
“Ha’u autoriza kompañia foti fatuk iha ne’ebá tanba sira mai ho dokumentu kompletu. Ha’u labele halo impedimentu tanba sira mai husu autorizasaun ho karta dokumentu komprovativu,” Administradór Domingos da Conceição dos Santos haktuir.
Nia argumenta tan, esplorasaun ne’ebé kompañia halo hodi konstroi Portu Tibar nune’e parte pozitivu ida ne’ebé kontribui ba dezenvolvimentu nasaun nian.
Agência Tatoli tenta atu konfirma asuntu ne’e ho kompañia China Harbour, maibé responsavel ka jestór kompetente sira iha hela Dili.
Jornalista : Hortencio Sanchez
Editór : Francisco Simões
