OÉ-CUSSE, 05 Jullu 2021 (TATOLI)—Sekretáriu Rejionál Asuntu Komérsiu no Indústria liuhosi Departamentu Komérsiu hala’o inspesaun ba loja no kioske 255 iha RAEOA seidauk iha dokumentu lisensa negósiu nian hosi Servisu Rejistrasaun no Verifikasaun Emprezariál (SERVE).
“Ekipa halo inspesaun ba kioske 352 iha sub-rejiaun Oésilo, Pasabe no Nitibe ne’e, kuaze kioske 255 mak laiha dokumentu lisensa negósiu hosi SERVE. Sira-ne’ebé iha lisensa ne’e hamutuk 97, la inklui Pante Makasar tanba seidauk halo inspesaun,” Sekretáriu Rejionál Asuntu Komérsiu no Indústria, Pedro da Cunha, informa ba Ajênsia Tatoli iha nia servisu fatin, Pante Makasar, Oé-Cusse, segunda ne’e.
Hosi inspesaun ba kioske 352 ne’e, nia informa, ekipa inspesaun deteta iha kioske 230 mak faan sasán liu prazu ne’ebé ekipa prende no kioske ne’ebé kumpre faan sasán ho loloos ne’e hamutuk 122.
Atividade inspesaun ne’e tuir loloos Autoridade Inspesaun Fiskalizasaun Atividade Ekonómika no Alimentár, Instituisaun Públika (AIFAESA,I.P) nia kompeténsia, maibé tanba serka sanitária no estadu emerjensia entaun autoridade RAEOA hato’o koñesimentu ba AIFAESA, nune’e bele hala’o atividade ne’e.
Atividade ne’e hala’o atu asegura komunidade hosi negosiante sira faan sasán nesesidade bázika ne’ebé liu prazu, entaun Governu persiza intervene atu labele hamosu moras seluk ba komunidade sira liuhosi konsumu sasán liu prazu ne’e.
“Objetivu hosi atividade ne’e atu kontrola sasán hirak ne’ebé liu prazu (expire data) no haree folin nesesidade bázika sa’e ka tun. Ami fó informasaun ba negosante sira-ne’ebé seidauk iha lisensa atividade negósiu, atu enkoraja sira, nune’e bele ba rejista iha Komérsiu no SERVE rejionál nian,” nia dehan.
Iha inspesaun ne’e, ekipa konsege prende sasán liu prazu barak maibé normálmente parte AIFAESA mak iha poder tomak atu prosesa sidadaun sira ne’e bainhira komete infrasaun ka viola lei ruma.
“Sasán sira-ne’ebé ita prende agora rai hela iha edifisiu no tuir planu ita sei halo destroisaun ka hakoi iha fatin lixu ne’ebé autoridade prepara ona. Iha tinan kotuk mós ita hala’o inspesaun dala ida, no rezultadu prende sasán ne’e halo destroisaun tanba ita relata rezultadu sira-ne’e ba iha AIFAESA nasionál,” nia hateten.
Folin sasán normál
Entretantu Sekretáriu Rejionál Asuntu Komérsiu no Industria ne’e hateten. durante estadu emerjensia no serka saniária ne’e, sasán nesesidade bázika ne’ebé faan iha kioske no loja sira iha RAEOA ne’e nia folin normál.
Maske iha komunidade balun ne’ebé hato’o keixa ba Komérsiu no Industria katak iha terrenu folin sasán sa’e, maibé bainhira ekipa to’o iha baze no halo identifikasuan ne’e rezultadu hatudu nesesidade bázika nia folin hanesan baibain.
“Ita mós halo peskiza iha sub-rejiaun izoladu hanesan Pasabe, sasán nia folin sa’e mak centavu 25. Ne’e, tanba sira mai foti iha vila ba fa’an tutan, entaun sira mai mós gasta osan selu transporte no selu ema ajuda tula sasán barak, entaun centavu 25 ne’e ba transporte nian,” nia haktuir.
Kona-ba asuntu ne’e, Jestór sub-rejiaun Pasabe, Anton Ulan fó sujestaun ba autoridade RAEOA bainhira hala’o atividade inspesaun iha baze, persiza involementu seguransa sivíl sira, nune’e sira hela ne’e bele kontinua tau matan.
“Ha’u sujere, se mai halo inspesaun involve mós ha’u-nia seguransa sivíl sira, atu nune’e sira ramata inpesaun karik seguransa sivíl sira kontinua tau matan. Tanba, Pasabe ne’e izoladu entaun sempre akontese, negosiante sira faan nafatin sasán liu prazu,” nia dehan.
Entretantu sasán nesesidade bázika ne’ebé Sekretáriu Rejionál Asuntu Komérsiu no Indústria prende mak hanesan Supermie, ikan lata, bebida Cocacola, Fanta, Sprite inklui serveza no seluk tán.
Jornalista : Abilio Elo Nini
Editór : Cancio Ximenes
