BOBONARO, 09 fevereiru 2022 (TATOLI) – Governu liuhosi Ministériu Turizmu, Komérsiu no Indústria (MTKI) munisípiu Bobonaro, planeia dezenvolve fatin istóriku haat iha munisípiu Bobonaro iha futuru.
Xefe departamentu MTKI munisípiu Bobonaro, Henriquito Marques Leite, aprezenta hato’o asuntu ne’e durante aprezentasaun progresu no dezafiu serbisu ba deputadu sira hosi komisaun E ne’ebé asuntu Infraestrutura iha salaun enkontru autoridade munisípiu Bobonaro, kuarta ne’e.
“Planu ba futuru atu dezenvolve fatin haat mak hanesan fortaleza Balibo, fortaleza ida iha Batugade, fatuk Buicari no abrigu komandante Nino Coni Santana nian. Fatin istóriku sira ba futuru ita dezenvolve bele atrai vizitór estranjeiru sira,” nia katak.
Nia dehan, fatin istóriku hirak-ne’e presiza dezenvolve tanba fortaleza Balibo nu’udar fatin istóriku Balibo Five no fatin ba administradór postu iha tempu koloniál portugés nian.
Fortaleza Batugade iha postu administrativu Balibo mós sai hanesan fatin istóriku iha tempu koloniál portugés, fatin ne’e utiliza ba prizaun hodi dadur timor-oan sira-ne’ebé kontra estadu no halo krime kontra ezérsitu portugés.
“Planu ba futuru fatin ida-ne’e presiza konserva no prezerva ho di’ak atu nune’e kontinua eziste no labele lakon, alende ne’e bele atrai turista atu mai vizita no sai mós patrimóniu kulturál iha munisípiu Bobonaro,” nia hateten.
Entretantu, fatin istóriku fatuk Buicari, lokaliza iha suku Atabae, postu administrativu Atabae sai mós hanesan fatin istoriku tanba fatin ne’ebé Alferiz Arbiru hosi Portugál mate no monumentu Alferiz Arbiru iha relasaun ho istória ne’ebé bele atrai turista estranjeiru sira.
Nune’e mós fatin turizmu abrigu Komandante Nino Coniz Santana iha suku Lourba, postu administrativu Bobonaro, nu’udar mós fatin istoriku ne’ebé presiza mós dezenvolve ho didi’ak tanba iha valór istóriku.
Jornalista : Sérgio da Cruz
Editór : Evaristo Soares Martins
