DILI, 08 jullu 2020 (TATOLI) – Governu liuhosi reuniaun Konsellu Ministru (KM) deside ezonera Francisco da Costa Monteiro no nomeia fali António José Loiola de Sousa ba kargu Prezidente Konsellu Administrasaun (KA) Timor Gás & Petróleu, Empreza Públika (Timor Gap, Ep) no ba kargu Prezidente Diresaun Ezekutiva Timor Gap nian ba mandatu tinan-haat, hahú 2020 to’o 2024.
Antes ne’e, António José Loiola de Sousa nu’udar Vise-Prezidente Timor Gap.
“Ohin Konsellu Minsitru halo deliberasaun ida hodi hatutan no konfirma tan proposta ida husi Ministériu Petróleu no Minerál (MPM) nian kona-ba ezonerasaun ba Francisco da Costa Monteiro husi kargu Prezidente Konsellu Administrasaun Timor Gap no ba kargu Prezidente Diresaun Ezekutiva Timor Gap nian no Konsellu Ministru mós nomeia filafali António José Loiola de Sousa ba kargu asume kargu refere,” informa Ministru ba Prezidénsia Konsellu Ministru, Fidelis Manuel Leite Magalhães hafoin reuniaun ezekutivu iha Palásiu Governu, kuarta ne’e.
Hatan ba razaun ezonerasaun ne’e, Minsitru Fidelis dehan ne’e bazeia ba proposta husi MPM ne’ebé KM hala’o avaliasaun no ezekutivu sira deside atu ezonera atuál Prezidente hodi troka foun.
“Ha’u bele dehan katak desizaun ne’e kompeténsia kualkér ezekutivu nian,” nia subliña.
Maski nune’e, governante ne’e hateten Governu apresia kontribuisaun no servisu tomak ne’ebé Prezidente Timór Gap sesante halo ona.
“Ita apresia ba konstribuisaun tomak ne’ebé prezidente sesante fó, maibé agora iha ona prezidente foun ba Timor Gap,” nia realsa.
Jornalista: Florêncio Miranda Ximenes
Editora: Julia Chatarina