COVALIMA, 20 fevereiru 2021 (TATOLI)- Populasaun iha Suku Fatumea, Bee Lulik Leten no Suku Nanu, Postu Administrativu Fatumea, Munisípiu Covalima, komesa preokupa no taridu ho folin foos ne’ebé sa’e maka’as hosi $14.00 ba ona $16.00 to’o $17.00 kada saku kilograma 25.
Administradór Postu Fatumea, Filomeno Cardoso, rekoñese negosiante sira hasa’e presu nesesidade báziku, la’ós de’it foos, maibé supermie kaixa ida antes ne’e fa’an $6.00 sa’e ba $8.00 mina Bimoli litru 5 antes ne’e fa’an $5.00 sa’e ba $6.00 to’o $7.00 no seluk tan.
“Loos duni antes ne’e sasán folin fa’an normal hela, maibé dezde implementasaun Estadu Emerjénsia, nesesidade báziku nia folin sa’e maka’as,” Administradór Postu Fatumea, Filomeno Cardoso, hateten ba Agência TaATOLI iha Sede Suku Bee Lulik Leten, Fatumea, sábadu ne’e.
Nia dehan, presu foos ne’e negosiante sira hasa’e, tanba problema ida maka kondisaun estrada aat no distánsia Suai-Vila ba Fatumea ho kilómetru 44 presiza konta mós osan enxe mina ba karreta.
Iha fatin hanesan, idózus João Cardoso hateten presu sasán nesesidade báziku sa’e afeta ba sira-nia moris tanba sira la iha kbiit atu sosa. Nune’e, sira aguenta de’it ona ho konsumu batar, ai-farina, talas no ai-han hirak ne’ebé moris ka kuda iha kintál-laran.
Iha parte seluk, Negosiante Loja Roman Bubersa Fatumea, Clara Madeira rekoñese folin sasán ladún estavel, tanba impaktu hosi surtu COVID-19. Aleinde ne’e kondisaun estrada ne’ebé aat prejudika tebes ba movimentasaun transporte atu transporta sasán loza nian.
“Agora ne’e situasaun arraska loos, rai-udan, estrada aat no situasaun COVID-19 blokeia movimentu tama-sai Covalima, tanba ami ba sosa foos iha Dili saku ida kilograma 25 ho presu $14,00 ami mai fa’an fali $16,00 to’o $17,00 no supermi mós ami fa’an $8,00 kada dos no mina Bimoli litru 5 ami fa’an $6,00” nia hateten.
Husu CLN apoia foos ba kbiit-laek
Iha parte seluk, Administradór Postu Fatumea, Filomeno Cardoso, informa nia hakerek ona proposta ida hodi haruka ba Prezidente Sentru Lojístika Nasionál (CLN), Agusto Junior Trindade, atu ajuda foos no ai-han seluk ba nia povu kbiit-laek sira.
Autoridade rasik rekolla ona dadus hosi totál abitante 4.286 hosi suku tolu hodi fó prioridade liu ba idózus.
Administradór ne’e husu mós ba Autoridade Inspesaun no Fiskalizasaun Atividade Ekonomia no Sanitária (AIFAESA) atu halo intervensaun hodi kontrola presu nesesidade báziku.
Jornalista : Eugénio Pereira
Editór : Francisco Simões
