DILI, 19 agostu 2020 (TATOLI)- Familia boot Komandu FALINTIL-Forsa Defeza Timor-Leste (F-FDTL), ohin, presta misa omenajen no agradesimentu ba eroi nasionál sira ne’ebé fó sira-nia vida tomak luta ba ukun-rasik-an.
Notísia Relevante : Xefe Estadu defende harii uma ba veteranu
Misa agradesimentu hodi komemora tinan-45 ezisténsia FALINTIL nian ne’e hala’o iha Igreja Parókia Santo António, Motael, Dili, prezide husi amu-lulik selebrante na’in tolu, Pe. Ilídio Correia, SDB Pe. Angelo Salsinha no amu-lulik Kapelaun F-FDTL, Pe. Rui Gomes, SDB.
Misa agradesimentu no omenajen ne’e partisipa husi Prezidente Repúblika, Francisco Guterres “Lú Olo”, Xefe Estadu Maiór Jenerál F-FDTL Majór Jenerál Lere Anan Timur ho ofisiál militár, Komandante Jerál PNTL, Komisáriu Faustino da Costa, Prezidente Tribunál Rekursu, membru governu balun no veteranu sira.
Padre selebrante, Ilídio Correia dehan, selebrasaun tinan-45 ezisténsia FALINTIL liuhusi misa solene agradesimentu nu’udar sarani ida di’ak hodi agradese ba Aman Maromak Nia grasa tomak no presta omenajen ba eroi FALINTIL sira.
“Parabéns ba ita boot sira, hosi família boot F-FDTL ne’ebé ohin selebra loron FALINTIL ba dala-45 ho misa agradesimentu,” hateten Amu Ilídio Correia.
Ida ne’e, amu Ilídio hatutan, nu’udar jestu ida di’ak, tanba hatene katak, buat hotu hahú husi Maromak, la’o ho Maromak, Maromak mak sei determina ema hotu nia destinu. Ne’e duni, jestu furak tebetebes atu sempre agradese ba Maromak ba grasa boot ne’ebé simu no husu atu nafatin tulun Timoroan hotu.
Nia dehan, FALINTIL-FDTL selebra tinan-45 nu’udar forsa ida metin ona kompara ho ema umanu ida ne’ebé hahú goja nia vida hodi sente nia moris di’ak no aat sira.
“Tinan 45 ita dehan hanesan ema karik idade tasak no maduru ona, tanba moris ne’e hahú husi idade 45 ba leten hodi goja vida. Ne’e katak, instituisaun ida ne’e mós tama ona idade maduru hodi sente nia moris moruk no todan hodi hola responsabilidade liu-liu atu garante seguransa ba Estadu no povu iha nasaun ne’e,” nia tenik.
Nia hatutan, F-FDTL iha responsabilidade boot atu halo servisu defende soberanu nasaun no povu atu moris hakmatek hodi hala’o sira-nia atividade hotu- hotu kontribui ba dezenvolvimentu.
“Sidadaun barak sente ita boot sira nia protesaun defende sira husi perigu, balun husu ita boot sira hala’o responsabilidade ida ne’ebé too martir barak mate atu lori Timor-Leste hetan paz no ukun an ho di’ak,” nia hatete.
Padre Ilídio dehan, eroi no povu barak ne’ebé luta iha funu naruk hamutuk FALINTIL mate ba rai ne’e sei moris haksolok liu, bainhira Timor-Leste moris iha dame nia laran.
remata misa agradesimentu, delegasaun Komandu F-FDTL hamutuk ho Prezidente Repúblika lori mós ai-funan ba kari iha Jardín Eroi iha Metinaro.
Antes ne’e, Xefe Estadu Maiór Jenerál F-FDTL, Majór Jenerál Lere Anan Timor husu nafatin ba Estadu Timor-Leste atu rekoñese no valoriza funu na’in veteranu no faluk, oan-ki’ak sira nia luta hanesan mós ho pensaun vitalisia ne’ebé eis titulares sira hetan.
Xefe Estadu Maiór F-FDTL, Koronel Calisto Santos “COLIATI” dehan, selebrasaun loron FALINTIL ba tinan ne’e ho tema “Ho espíritu FALINTIL Nian Ha’u Prontu no Desididu Atu Serbí Povu no Nasaun Nia Interese” ne’ebé hahú ho atividade Tour FALINTIL hale’u munisípiu-12 no apoia ai-han povu kbiit laek no hala’o semináriu nasionál ho tema semináriu tema “Consolidação Estratéjigico para Garantir a Segurança Maritima de Timor-Leste”.
Tuir ajenda, kinta aban, sei iha serimónia militár iha kuartél-jenerál F-FDTL nian sei hahú iha tuku 8:00 Otl, no Prezidente Repúblika, Francisco Guterres “ Lú Olo” sei hato’o mensajen jerál ba F-FDTL.
Hafoin onra militár, no integrasaun Estandarte Nasionál ba Forsa sira iha Parada, sei iha mós omenajen atu hanoin hikas fali Eroi Nasionál sira ne’ebé mate iha funu-laran.
Molok diskursu sira husi Xefe Estadu-Maiór-Jenerál F-FDTL, Majór-Jenerál Lere Anan Timur, no husi Prezidente Repúblika, sei halo anúnsiu ba promosaun militár sira.
Tuir fali ida-ne’e maka Forsa sira iha Parada sei halo desfile no tuir mai sei han meiudia nian no fahe malu.
Jornalista : Eugénio Pereira
Editór : Francisco Simões
