DILI, 05 outubru 2020 (TATOLI)- Tanba de’it problema deve osan $200 la fó fila lori tempu naruk, hamosu problema tentativa omisídiu entre kolega di’ak na’in-rua ne’ebé moris hamutuk iha tinan barak foti kro’at hakanek malu.
Kazu ida ne’e, akontese ba kolega di’ak nain-rua ne’ebé konsidera nu’udar maun-alin di’ak, hanesan suspeitu ho inisiál QD ne’ebé lori katana taa kanek ninia kolega vítima Fernando dos Santos, ne’ebé akontese iha Suku Buulolo, Postu Administrativu Letefoho, Munisípiu Ermera iha loron 2 outubru liubá.
Suspeitu QD ho nervozu lori katana taa kanek vítima Fernando dos Santos rezulta ninia liman loos naklees , tanba de’it haksesuk kona-ba osan $200 ne’ebé vítima deve kleur ona.
“Vítima ho naran, Fernando dos Santos, tinan 42, hetan taa hosi suspeitu nia maun-alin ho inisiál QD, tinan 41, tanba problema vítima deve suspeitu nia osan $200 la fó fila, hamosu dezentendimentu, ikus mai mosu tentativa omisídiu ne’e,” dehan portavós PNTL, Superintendente Xefe, Arnaldo de Araújo ba jornalista, ohin, liuhosi konferénsia imprensa iha Kuartél Jerál PNTL, Caicoli, Dili.
Akontesimentu ne’e, parte família balun konsege teri netik, hodi akalma suspeitu no halo kedas asaun salva vítima lori ba klínika no parte PNTL mós to’o hodi detein suspeitu no halo kedas investigasaun.
Daudaun ne’e vítima ne’ebé kanek evakua ona ba tratamentu saúde iha Sentru Saúde Postu Administrativu Gleno-Ermera no suspeitu rasik, PNTL Ermera detein no aprezenta ona kazu ne’e ba Ministériu Públiku halo primeiru interrogatóriu iha Tribunál.
Jornalista: Eugénio Pereira
Editór: Francisco Simões