DILI, 16 jullu 2020 (TATOLI)-Ambulánsia hamutuk 62 maka durante ne’e halo operasaun hodi tula ema moras sira iha Sentru Saúde, Ospitál Referál no mós Ospitál Nasionál hamutuk 62, maibé sanulu mak labele halo ona manutensaun tanba ninia kondisaun grave.
Husi ambulánsia 62, 42 maka sei iha kondisaun di’ak, 10 iha ona prosesu manutensaun maibé, 10 seluk mak labele hadi’a tanba kondisaun grave liu ona ho nia kustu manutensaun mós karun liu depois uza tempu kle’ur , divulga relatóriu husi Diresaun Nasionál Servisu Apoia Ospitalár no Emerjénsia Ministériu Saúde.
”Ida ne’e mak tékniku ofisina sira sujere labele hadi’a tan tanba durante ne’e uza ba tempu naruk nian no grave liu ona,’’dehan Diretór Nasionál Servisu Apoia Ospitalár no Emerjénsia Nilton da silva, ba jornalista sira iha nia servisu fatin kinta ne’e.
Enkuantu, ambulánsia multi-funsaun iha Sentru Internamentu no mós Postu Saúde, Opsitál Referál no Nasionál hamutuk 105 no husi númeru ne’e, 62 maka sei iha kondisaun di’ak.
”Kondisaun ne’ebé mak ita sei bele hadi’a hamutuk 27 no 15 mak tékniku sira labele hadi’a ona tanba ho razaun hanesan katak karreta multi-funsaun grave liu ona,’’ tenik Nilton.
Karreta ambulánsia ne’ebé maka labele hadi’a ona sei entrega ba diresaun Patrimoniu Estadu.
Jornalista : Felicidade Ximenes
Editór : Agapito dos Santos
