DILI, 23 marsu 2021 (TATOLI)-Prokuradór Jerál Repúblika (PGR, sigla portugés), José Ximenes, informa, Ministériu Públiku hato’o ona pedidu ba Tribunál Distritál Dili (TDD) atu bele halo mandadu kapturasaun Francisco Kalbuadi Lay, maibé TDD ho Tribunál Rekursu (TR) dehan, lei ida-ne’e laiha.
“Francisco Kalbuadi Lay agora ba pasiar iha ne’ebé ha’u la lahatene no ami haruka ona mandadu kapturasaun internasionál, maibé Tribunál Distritál Dili (TDD) ho Tribunál Rekursu (TR) dehan lei ida-ne’e laiha,” Prokuradór Jerál Repúblika, José Ximenes, informa hodi responde jornalista iha Palásiu Prezidensiál, Dili, tersa ne’e.
Notísia Relevante : Francisco Kalbuadi Lay sei inosente iha prosesu judisiál
Maske José Ximenes, informa katak MP haruka pedidu kapturasaun internasionál, maibé José Ximenes la esplika detalladu kona-ba razaun ba kazu saida mak Francisco Kalbuadi Lay komete to’o MP husu mandadu kapturasaun internasionál.
Antes ne’e, iha loron 11 fevereiru 2021 Agéncia Tatoli, halo entrevista ida ho Juis Administradór Tribunál Distritál Dili (TDD), Afonso Carmona, kona-ba Francisco Kalbuadi Lay komete kazu saida maka rejistu iha TDD, nune’e Afonso Carmona klarifika katak Francisco Kalbuadi Lay sei inosente iha prosesu judisiál.
“Prosesu judisiál saida de’it iha nia andamentu. Ita seidauk bele dehan ema loos ka sala, bainhira Tribunal seidauk pronúnsia buat ida, tanba ne’e konsidera ema hotu sei inosente,” Afonso Carmona, hateten.
Afonso Carmona afirma, prosesu sira hotu seidauk bele deklara Francisco Kalbuadi Lay, sala ka lae no komete kazu saida, tanba sei konsidera inosente no iha hela segredu justisa nia laran.
Juis Administradór TDD, Afonso Carmona, halo ona distribuisaun prosesu ba juiz titulár no juiz titulár mak sei iha kompeténsia atu marka audiénsia julgamentu.
Tuir regra prosesuál bainhira juiz titular simu ona autos sei haree kona-ba kestaun préviu tuir artigu 239 iha kódigu prosesu penál kona-ba akuzasaun ninia apresiasaun iha alínea:
a). Hateten koñese, kuandu bele koñese iha altura ne’e, kona-ba kompeténsia, lejítimidade, nulidade, exesaun seluk ka kestaun previa, ne’ebé bele impede Tribunál atu koñese méritu-da-kauza;
b). Fó despaxu katak la simu akuzasaun, kuandu konsidera akuzasaun manifestante infunda;
c). Simu akuzasaun no marka loron ba julgamentu, kuandu haree katak prosesu tenke hakat ba julgamentu no mós tuir artigu 237,238 iha kódigu prosesu penál kona-ba notifikasaun no haruka ba julgamentu, tanba ne’e prazu loron lima juis sei halo apresiasaun hodi bele hasai despaxu.
Jornalista : Nelson de Sousa
Editór : Francisco Simões
