iklan

EKONOMIA, HEADLINE

MAF ho Governu Timor-Leste ofisialmente lansa voo doméstiku regular foun

MAF ho Governu Timor-Leste ofisialmente lansa voo doméstiku regular foun

Aviaun MAF. Imajen/TATOLI

DILI, 15 marsu 2023 (TATOLI)— Mission Aviation Fellowship (MAF)    ne’ebé halo kooperasaun ho USAID Tourism for All Project hamutuk hamutuk ho Governu Timor-Leste (TL) liuhosi Ministériu Agrikultura no Peska (MAP) kuarta ne’e, ofisialmente lansa voo doméstiku regular ba sidade hitu inklui Dili.

Lansamentu ba voo doméstiku regular foun ne’e lansa direitamente hosi Enkarregadu Negósiu hosi Embaixada Estadu Unidu América (EUA) Tom Daley, Vise Ministru agrikultura no Peska (MAP) Abílio Xavier de Araújo ne’ebé reprezenta Ministru Transporte no Komunikasaun (MTK) no Diretór Nasionál MAF Timor-Leste, Nick Hitchins inklui konvidadu sira seluk.

Vise Ministru agrikultura no Peska (MAP), Abilio Xavier de Araújo, hato’o agradese ua’in ba kooperasaun hosi MAF ne’ebé fornese voo doméstiku regular ida ne’e hodi apoiu komunidade bele asesu lalais konetividade hosi munisipíu ida ba munisípiu seluk.

“Hanesan ita hotu hatene viajen hosi munisipíu ba munisípiu ida lori tempu barak no bele lori to’o oras ualu liu. Nune’e ho prezensa voo doméstiku regular ida ne’e bele fasilita ita, iha situasaun ne’ebé daudaun ho kondisaun infaestrutura hanesan dalan sira ne’ebé ladi’ak. Ida ne’e ajuda tebes komunidade liuliu sira ne’ebé moras ka iha situasaun emerjénsia ruma atu transporta mai Dili,” Abilio Xavier de Araújo hateten iha Aeroporto Internasional Nicolau Lobato Comoro, Dili.

Notisia relevante : Fulan oin, MAF sei lansa Voo doméstiku regular foun iha Timor-Leste

Iha fatin hanesan, Enkarregadu Negósiu hosi Embaixada Estadu Unidu América (EUA) Tom Daley, hateten, EUA orgullu suporta voo doméstiku regular tanba ida ne’e, hanesan komponente importante hodi hametin konetividade rejional no dezenvolve infraestrutura turizmu, ne’ebé hasa’e kresimentu ekonómiku no prosperidade Timor-Leste nian.

“Viajen hosi área aero nian nu’udar komponente importante ida hosi estratéjia hasa’e kresimentu turizmu nian iha Timor-Leste. Ita espera  servisu voo doméstiku ne’ebé MAF aumetan tan ne’e bele hasa’e númeru vizitante turista sira iha mundu hodi fó benéfisiu ba populasaun lokál sira,” nia dehan.

Tanba liuhosi voo doméstiku regular ida ne’e bele fasilita turista sira hosi munisípiu ba munisípiu inklui apoiu komunidade lokal sira iha situasaun emerjénsia ruma.

Diretór Nasionál MAF Timor-Leste,  Nick Hitchins, hateten, MAF orgullu hodi realiza eventu lansamentu ofisiál ne’ebé halo koperasaun ho USAID Tourism for All Project. Hein katak liuhosi estabelesimentu infraestrutura ba transporte foun no turizmu iha rejiaun bele hadiak liutan movimentasaun ba komunidade lokal sira.

“Loron ohin importante tebes bá Timor-Leste tanba durante tinan 16  ami nia foku tradisionalmente haree liu ba iha evakuasaun médika no MAF  orgullu tanba ohin loron kontinua, dezenvolvimentu ba servisu aero iha Timor-Leste. Ida ne’e importante ida atu atinje ami-nia misaun no ida ne’e parte kiik ida ne’ebe hodi tulun nasaun liuhosi komunidade lokal sira hosi munisípiu ida ba munisípiu seluk,” nia dehan.

Voo doméstiku regular ne’e rasik halo operasaun hahú iha loron 20 fulan ne’e no kustu hahú hosi $30 to’o $150. Voo ne’e rasik sei tula ema na’in hitu mak pasajeiru na’in lima inklui pillotu rua no sasán todan kilograma 50.

Notisia relevante : Operasaun voo doméstiku Dili-Ataúro ho MAF transporta ona pasajeiru 1.400

“Bainhira ami-nia servisu ba voo nian hahú ona, billete bele sosa iha Air Timor, nomós ajénsia lokal MOSAN iha kada sidade nomós bele sosa direitamente iha edifísiu MAF liuhosi númeru Whatsapp,” nia dehan.

Nune’e, oráriu ba voo domestika regular nian halo viajen mak hanesan, loron segunda Voo regular Ataúro sei semo Dili ba Ataúro. Voo regular Maliana sei semo Dili ba Maliana. Tersa Voo regular kosta súl tasi-mane sei semo Dili, Baucau, Viqueque, Same, Suai no Voo regular ponta leste sei semo Dili, Baucau no Lautem.

Oráriu ba kuarta nian, Voo regular Ataúro sei semo Dili ba Atauro. Kinta Voo regular hosi kosta súl tasi-mane sei semo Dili, Baucau, Viqueque, Same, Suai no Voo regular ponta leste sei semo hosi Dili ba Baucau no Lospalos.

Loron sesta-feira nian, Voo regular Ataúro sei semo hosi Dili ba Ataúro. Voo regular Maliana sei semo hosi Dili ba Maliana, no sabadu nian Voo regular Ataúro sei semo iha Dili ba Ataúro.

Jornalista : Arminda Fonseca

Editora     :  Armandina Moniz

 

 

 

 

 

iklan
iklan

Leave a Reply

iklan
error: Content is protected !!