DILI, 09 fevereiru 2022 (TATOLI)—Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú fulan-janeiru to’o horisik pasiente dengue sa’e ba 1.799 hosi númeru ne’e na’in 29 mak mate.
“Situasaun kazu dengue iha Timor-Leste hosi janeiru mai too horiseik hamutuk kazu 1.799 no kumulativu óbitu na’in 29,” refere nota ne’ebé Agência TATOLI asesu, kuarta ne’e.
Maioria kazu ne’e deteta husi Munisípiu Dili ho totál 1.181, Baucau 82, Manatuto 104, Covalima 63, Ermera ho kazu 77, Manufahi 75, Viqueque 30, Ainaro 24, Liquiça 40, Aileu 37 no Bobonaro 28 Lautem 39 no RAEOA tolu.
Munisípiu Dili nafatin rejista kazu ne’ebe a’as iha primeira semana to’o sesta semana fulan fevereiru 2022, ho totál kazu 1.181 kazu. Nune’e haree ba kada loron kazu aumenta bebeik husi Munisípiu Dili.
To’o ohin loron hahú semana dahuluk fulan janeiru tinan 2022, kazu dengue hosi postu administrativu Dom Alexo iha 630, Cristo-Rei 239, Vera-Cruz 133 no Nain Feto 114
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 266, Klínika Fatumeta 161, sentru saúde Comoro 348, sentru saúde Vera-Cruz 51, sentru saúde Formoza 180, sentru saúde Becora 124 klinika madre eliza ida, sentru saúde Atauro 11, sentru saúde Metinaro 19, klínika Bairru-Pité 17 no klínika Motael na’in-rua.
Muda izolamentu Tasi-Tolu
Ho númeru kazu dengue ne’ebé kada loron aumenta, Ministériu Saúde planu atu muda izolamentu Tasi-Tolu ba fatin tratamentu pasiente dengue.
“Izolamentu Tasi-Tolu sei sai fatin ba tratamentu kazu dengue nian tanba ita haree kazu dengue no COVID-19 númeru aumenta ba bebeik. Daudaun pasiente dengue sira ne’ebé mak baixa iha Vera-Cruz ita sei lori ba iha Tasi-Tolu hodi halo tratamentu iha ne’ebá tanba ita lakohi kahur pasiente COVID-19 no pasiente dengue tanba fó servisu todan ba médiku no enfermeiru sira,” Minsitra Saúde, Odete Maria Freitas Bel, informa hafoin enkontru ho Xefe Governu iha Rezidénsia Faról.
Ho Profisionál Saúde ne’ebé mak iha sei apoia ba servisu dengue no mós kazu COVID-19-nian tanba Ministériu Saúde mós kontratu ona médiku na’in-29.
MS apela ba populasaun
Nune’e, Ministra Odete apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Notísia relevante: Surtu dengue: númeru pasiente 1.705 no óbitu na’in-28
Jornalista : Felicidade Ximenes
Editór : Florencio Miranda Ximenes
