iklan

NASIONÁL, EKONOMIA, HEADLINE

Capital Group Timor-Leste hakarak loke rekrutamentu ba funsionáriu na’in-150

Capital Group Timor-Leste hakarak loke rekrutamentu ba funsionáriu na’in-150

Primeiru-Ministru, Kay Rala Xanana Gusmão, akompaña hosi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay hasai fotografia hamutuk ho ekipa Capital Group Timor-Leste, iha salaun enkontru GPM, iha Palásiu Governu, kinta (21/03/2024). Imajen/Mídia GPM

DILI, 22 marsu 2024 (TATOLI)-Primeiru-Ministru (PM), Kay Rala Xanana Gusmão, akompaña hosi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay hala’o enkontru ho ekipa Capital Group Timor-Leste hodi rona introdusaun programa.

Programa ne’ebé grupu ne’e atu lansa iha tempu badak maka rekrutamentu foun ida ba funsionáriu na’in-150 ba projetu Outsourcing Prosesu Negósiu (BPO) inklui servisu atendimentu ba kliente sira, ne’ebé sei loke iha tinan 2024 nia klaran.

Ekipa Capital Group Timor-Leste kompostu hosi Prezidente, Steven Amidjojo, Xefe Operasaun Timor-Leste, António Sampaio, Frans Jacobs, CTO Capital Group Timor-Leste, Patrice Rodrigues, Compliance Capital Group Timor-Leste, Teresa Garcia André, Miranda, Richard Leather, Chairman VGA no Soraia Lourenço, Sekretáriu Jerál VGA.

“Ida-ne’e hanesan oportunidade ne’ebé furak tebes ba foin-sa’e sira iha Timor-Leste atu hetan formasaun no serbisu iha setór foun ida no hetan saláriu ne’ebé a’as liu no sai parte iha projetu foun ida-ne’ebé boot ba país. Capital Group iha kompromisu atu kria empregu iha Timor-Leste no projetu ida-ne’e iha ambisaun atu aumenta maka’as iha tinan hirak oin mai,” Xefe Operasaun Capital Group Timor-Leste, António Sampaio, informa ba jornalista sira, iha Palásiu Governu, kinta (21/03).

Notísia relevante : Aplikante bolsa rekrutamentu ba profesór 13.021 admitidu atu tuir teste eskrita

Programa ne’e hanesan projetu boot dahuluk iha Timor-Leste, ne’ebé foka liu ba ekonomia dijitál no buka atu fó serbisu no formasaun ba Timór-oan barak. Empreza balun, iha setór oin-oin, hatudu ona interese atu uza BPO foun, ne’ebé signifika katak sei kria tan empregu iha tinan ida-ne’e tanba projetu ne’e aumenta.

BPO daudaun prepara fatin serbisu iha edifísiu foun iha ETO Tower, Dili ne’ebé sei inklui fasilidade formasaun, ajente no supervizór, ne’ebé funsionáriu sira sei simu formasaun molok hetan kontratu.

Antigu Jornalista Ajénsia LUSA dehan, grupu ne’e harii ho objetivu atu kontribui ba dezenvolvimentu Timor-Leste no apoia formasaun ba foin-sa’e  Timór-oan.

“Ita hakarak kontribui atu hadi’a povu no komunidade Timor-Leste nia moris, no hakarak sai parte husi mudansa transformasaun, ne’ebé ajuda haforsa jerasaun foun no kresimentu husi kapasidade iha ekonomia no nasaun tomak,” Sampaio akresenta.

Ekipa sei hili funsionáriu sira atu hetan formasaun ho saláriu no empregu iha futuru iha prosesu rekrutamentu iha faze tolu ne’ebé inklui teste online ida-neʼebé sei kompleta iha lian inglés ka portugés, teste ida-neʼebé halo prezensiál no ikus liu entrevista sira. Grupu kandidatu sira ne’ebé selesionadu ikus sei tuir formasaun durante semana ne’ebé inklui lian, abilidade serbisu jerál no formasaun operasionál espesializada.

“Ami buka ema sira ne’ebé bele hola kompromisu, pelumenus ramata ona Eskola Sekundária, gosta serbisu ho komputadór, iha abilidade lian inglés ka portugés no atensaun a’as ba detallu. Feto, ema ho defisiénsia no membru komunidade LGBTQI+ sira enkoraja tebes atu aplika,” nia subliña.

Projetu ne’e buka atu responde ba nesesidade ne’ebé aumenta ba empregu foun sira iha Timor-Leste, no foka liu ba prioridade importante balun Governu nian, hanesan diversifikasaun no kreximentu ekonómiku, dezenvolvimentu kapitál umanu, kresimentu setór IT iha país no investimentu setór privadu, no seluk-tán.

Kandidatu funsionáriu sira ne’ebé hakarak aplika, bele vizita https://capitalgroup.tl/atu rejista. Tuir bele tuir informasaun iha pájina facebook Capital Group Timor-Leste, atu hetan atualizaun kona-ba prosesu rekrutamentu.

Prosesu rejistu sei loke durante loron-30 tuir mai, hafoin halo avaliasaun ba teste online, kandidatu sira ne’ebé di’ak liu sei tuir ezame individuál prezensiál, tuirmai sei hili grupu ida atu halo entrevista no ikus liu hili grupu atu ba formasaun no serbisu karik ho Capital Group.

Bele mós halo kontaktu ho pesoál husi Capital Group Timor-Leste liuhosi info@kapitalgroup.tl atu hetan informasaun detallu kona-ba programa no atividade sira.

Jornalista      : Antónia Gusmão

Editora           : Julia Chatarina 

iklan
iklan

Leave a Reply

iklan
error: Content is protected !!