Ministru Justisa, Tiago Amaral Sarmento, halo vizita ba Pertamina Internasionál Timor SA iha Pantai Kelapa-Dili. Imajen/MJ

DILI, 24 juñu 2022 (TATOLI)-Governu liu hosi Ministru-Justisa, Tiago Amaral Sarmento, sesta ne’e, selebra ona akordu arrendamentu ho CEO Pertamina Internasionál, Beny Harto Wijaya, hodi hahú selu arrendamentu rai ba Estadu kada fulan $10.000 durante tinan 30.

Akordu arrrendamentu ne’e baseia ba dekretu-lei númeru 19/2004 kona-ba arrendamentu bainhira uza rai propriedade Estadu nian.

Notísia Relevante :MJ: Pertamina Internasionál aseita asina kontratu arrendamentu no selu dívida

“Ohin Ministru-Justisa selebra kontratu arredamentu ba rai no propriadade sira ne’ebé iha Pantai Kelapa, ne’ebé okupa hosi kompañia Pertamina durante tinan hirak ne’e,” Ministru Justisa Tiago Amaral Sarmento, hateten hafoin selebra akordu ne’e iha Ministériu Justisa, Caicoli Dili.

Tuir relatóriu levantamentu husi Diresaun Terras Proriadade no  Serbisu kadastrál halo ona antes ne’e ba Pertamina Internasionál SA uza rai ektáres tolu hodi halo atividade negósiu iha Timor-Leste.

“Iha kontratu arredamentu ne’e sira iha obrigasaun tenke selu valór arredamentu $10.000, kada fulan,” Governante ne’e hateten.

“Depois akordu ne’e, Pertamina iha obrigasaun fulan-fulan tenke selu ona arredamentu ba Estadu, no parte Partamina rasik hakarak kolabora sira sei selu arredamentu,” tenik tan.

Kona-ba Pertamina Internasional SA la selu arrendamentu ba kofre Estadu durante ne’e, Governante ne’e hateten ninia Ministériu laiha dadus kona-ba dividas hira mak Pertamina ne’e la selu, tanba Governu antes ne’e laiha akordu arrendamentu ho kompañia internasionál ne’e.

“Maibé Governu ida ne’e ha’u ho ha’u kolega Ministru sesante esforsu liu hosi Diresaun Terras Proriade no Serbisu Kadastrál nian,  ohin ita bele selebra akordu arredamentu, nune’e bele regulariza sira (Pertamina), halo sira-nia atividade hodi hahú selu aredamantu fulan-fulan,”  nia hateten.

Governante ne’e esplika Emprezariu Timor-oan balun mós daudaun ne’e investe ona asaun (saham) iha kompañia Pertamina Internasionál SA.

“Tanba sira join venture ona ho empreza Timor-oan balun, no ita-nia Timor-oan sira ne’e, nia saham 50% iha laran, maioria 90% traballadór ema Timor maka serbisu iha ne’ebá, tanba ne’e, ita selebra akordu ida ne’e ho sira ba tinan 30 hodi bele asegura sira-nia atividade no asegura mós ita-nia Timor-oan sira-nia saham sira iha laran inklui ita-nia traballadór sira,” nia hateten.

Iha fatin hanesan, CEO Pertamina Internasionál, Beny Harto Wijaya, hateten nia parte sente kontente tanba iha ona kontratu arredamantu ho Governu.

“Ami agradese ba Governu Timor-Leste liuliu Ministeriu-Justisa tanba iha ona kontratu arredamentu ho Ministru-Justisa,”Nia hateten.

Notísia Relevante :MJ sei asina kontratu arrendamentu rai ho Pertamina Internasionál

 Jornalista: Natalino Costa

Editór : Agapito dos Santos 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here