Guarda Prijaun Becora tulun dadur sira sa'e karreta hodi transfere ba Prijaun Suai. Imajen Tatoli/Dok.

DILI, 24 juñu 2022 (TATOLI)-Ministru Justisa, Tiago Amaral Sarmento, promete sei rezolve problema transporte, hadi’a kondisaun infraestrutura, no mós planu promosaun ba guarda prizionál sira iha prizaun Becora, Gleno no Suai.

Prizaun Becora durante ne’e iha karreta operasionál hamutuk tolu, maibé karreta rua avaria ona hodi difikulta guarda prizionál sira atu tula dadur sira bá tuir julgamentu iha Tribunál no mós tula dadur sira bá prizaun Gleno Munisípiu Ermera no Suai.

Notísia Relevante :Prezu 656 Halo Prizaun Becora “Over Capacity”

“Liga ba transporte  ne’ebé maka tula dadur sira hosi estabelesimentu prizaun Becora bá julgamentu no transporta dadur sira ba Gleno, daudaun ne’e iha tolu, maibé rua avaria no iha ida de’it  maka funsiona, Ministru Justisa sei tau atensaun tenke tau atensaun hodi rezolve lalais duni ida ne’e,” Ministru Tiago Amaral Sarmento, hateten ba jornalista sira hafoin halo vizita ba prizaun Becora kinta ne’e.

Ministériu Justisa liu hosi Diresaun Aprovizionamentu loke ona konkursu públiku ba kompañia sira atu konkore hodi halo manutensaun ba transporte rua ne’e iha tempu besik.

Alende transporte, prizaun Becora mós iha mákina produsaun batako boot ida ne’ebé maka antes ne’e Governu Japaun maka oferese  maibé avaria kleur ona.

“Sira husu mós atu hadi’a mákina produsaun batako nune’e  prizioneiru sira bele halo atividade balun liga ho produsaun batako, tanba ami iha tempu badak  sei prevee osan $18 mill atu halo manutensaun  ba mákina refere, atu bele fasilita prizioneiru sira halo atividade iha prizaun laran,” Governante ne’e dehan.

Problema seluk maka Governu persiza halo promosaun ba Guarda Prizionál sira, tanba guarda prizionál balun servisu ona durante tinan 20, maibé  seidauk  hetan promosaun atu hasa’e sira-nia nivel.

“Ami sei haree iha tempu badak ita sei halo promosaun ba sira, nune’e motiva sira hodi halo serbisu loron-loron ho di’ak liután,”nia hateten.

Kona-ba kondisaun infraestrutura, Minsitru ne’e rasik rekoiñese prizaun Becora laiha ona espasu hodi akumula dadur sira ho kuantidade boot.

Tanba ne’e,  Ministériu Justisa prepara ona rai ektáre 800 iha área Wedaberek, Munisipiu Manufahi nian hodi konstrõe prizaun foun ba dadur sira.

Atu realiza planu konstrusaun foun ne’e maka Ministériu Justisa, aprezenta ona planu ho dezeñu ne’e ba iha Ministériu Finansa hodi prevee iha proposta orsamentu jerál Estadu 2023.

Iha fatin  hanesan Diretór Prizaun Becora, João Domingos hateten,  problema prizaun Becora maka transporte ne’ebé tula dadur sira bá tuir julgamentu avaria hotu ona.

No kestaun seluk maka suzere ba Ministériu Justisa persiza halo altersaun ba estatutu Guarda Prizioneiru sira-nian hodi bele loke dalan  ba promosaun.

“Daudaun ne’e totál guarda prizioneiru ne’ebé iha 100, barak maka nivél ki’ik tanba ne’e parte Ministériu Justisa presiza tau matan,”nia esplika. 

“Buat hotu hotu kona-ba  neseidade prizioneiru nian, Guarda Prizioneiru nian no inklui carro celular ne’ebé tula prizioneiru sira ami hato’o ona problema no difikuldade sira ne’e ba ona ita hein desizaun de’it,” Nia informa.

Entertantu, iha tempu besik, Ministru Justisa Tiago Amaral Sarmento, sei hala’o vizita hanesan ba prizaun Gleno Munisípiu Ermera no Suai Munisípiu Covalima.

Notísia Relevante :MJ sei hadi’a moru SFJJ-prizaun Becora iha tempu badak

Jornalista: Natalino Costa

Editór     : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here