iklan

HEADLINE, MUNISÍPIU, OÉ-CUSSE (RAEOA), POLÍTIKA

Autoridade RAEOA nomea Teodoro Sila nu’udar jestór foun iha Nítibe

Autoridade RAEOA nomea Teodoro Sila nu’udar jestór foun iha Nítibe

Jestór sesante no jestór foun ba sub-rejiaun Nítibe asina termu entrega serbisu, ne'ebé akompaña hosi Diretór MAE. Imajen mídia Sekretáriu Rejionál Administrasaun.

OÉ-CUSSE, 24 juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), nomea Teodoru Sila, nu’udar jestór foun ba suku lima iha sub-rejiaun Nítibe, hodi troka jestór sesante, Manuel Tolan.

Nomeasaun ne’e bazea despaxu númeru 13/V/2022/PA/RAEOA-ZEESM TL, nomoos bazea lei númeru 3/2014, 18 juñu kona-bá kriasaun RAEOA no dekretu-lei númeru 5/2015 janeiru, aprova estatutu RAEOA.

Nune’e, Sekretáriu Rejionál ba Asuntu Administrasaun no Estatál, Martinho Abani Elu, uza nia kompeténsia rasik ne’ebé prevista iha artigu 44 versiklu 1, estatutu RAEOA no dekretu-lei númeru 5/2015 22 janeiru, hato’o pedidu ezonerasaun ba, Manuel Tolan, nu’udar tékniku profisionál grau D/1, hosi kargu jestór sub-rejiaun Nítibe.

Hodi propoin, Teodoru Sila, tékniku profisionál grau D/1 subtitui ein komisaun servisu ba jestór sub-rejiaun Nítibe atu asegura funsionamentu servisu iha diresaun rejionál administrasaun ne’ebé tutela iha Sekretáriu Rejionál ba Asuntu Administrasaun no Estatál ba sub-rejiaun Nítibe.

“Mudansa halo dadaun ne’e dahuluk mak iha Nítibe, ne’e la’os kestaun polítika maibé servisu kleur ona iha Nítibe dezde 2015 to’o agora, entaun presiza kadernizasaun foun atu mellora servisu di’akliu tán,” Martinho Abani hatete iha Oé-Cusse sesta ne’e.

Nia fundamenta, pedidu ezonerasaun ne’e submete hosi Sekretáriu Rejionál ba Asuntu Administrasaun no Estatál, hetan aprovasaun no despaixuhosi Prezidente Autoridade hodi kontinua públika kedan iha Jornál Repúblika.

“Tan ne’e, iha semana ne’e ha’u hasai ona despaixu nomeasaun ba jestór foun hanesan responsável finansa iha administrasaun, agora asumi kargu foun iha sub-rejiaun Nítibe hahú loron 20 juñu ba oin ho nia mandatu durante tinan rua,” Martinho Abani Elu informa.

Entretantu, jestór sesante sub-rejiaun Nítibe, Manuel Tolan, asumi kargu nu’udar jestór Nítibe hahú iha 2015 hafoin implementa projetu ZEESM iha Oé-Cusse.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!