Autoridade konstrui irrigasaun fasilita natar na'in-36 iha suku Lifau. Imajen mídia ZEEMS.

OÉ-CUSSE, 24 juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) konstrui kanál irrigasaun hodi fasilita natar na’in-sira hamutuk 36 iha suku Lifau, sub-rejiaun Pante Makasar.

Konstrusaun irrigasaun ne’e ho distánsia metru 150 hodi responde ba natar ektare 7-resin, ne’ebé ezekuta hosi empreza Leorota Unip, Lda ho valór orsamentu hamutuk $ 34.286.53, ne’ebé autoridade aloka hosi Orsamentu Jerál Estadu (OJE) 2022 nian.

Nune’e iha kuarta ne’e semana ne’e autoridade liuhosi Sekretáriu Rejionál ba Asuntu Agrikultura halo ona inaugurasaun hodi entrega ba natar na’in-sira atu uza fasilita bee ba natar sira.

Diretór Diresaun Rejionál Agrikultura, Cirilo dos Remedios Baba, informa, projetu kanál irrigasaun ne’e la tama ba iha planu anuál diresaun nian, maibé tanba nesesidade natar na’in sira maka Autoridade RAEOA liuhosi Diresaun Rejionál Agrikultura buka dalan no konsege halo duni.

“Entaun konstrusaun ne’e ita entrega ona ba komunidade atu uza, maibé uza presiza kolaborasaun entre natar na’in-sira, atu labele estraga, tanba ne’e ita halo ho osan Estadu, entaun tenke iha nia rezultadu tau matan ba obra ne’e hodi bele uza ba tempu naruk,” nia fó hanoin.

Xefe suku Lifau, Lazaro Quenat, orgullu hato’o agradese ba autoridade RAEOA tanba tulun ona natar na’in-sira iha natar Lifau.

“Irrigasaun ne’e bele ajuda no fasilita ona bee ba natar sira, tanba antes ne’e kanál seidauk konstrui bainhira natar na’in sira atu halai natar to’o kuda, sempre gasta enérjia no osan hodi kanaliza kanál maibé ohin benefisiáriu sente kontenti tanba liuhosi Autoridade RAEOA nia tulun,” autoridade lokál ne’e orgullu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here