Xefe suku Samalari, Rui Sorteiro Magno Siqueira. Imajen TATOLI/Natalino Belo

DILI, 23 juñu 2022 (TATOLI)—Xefe suku Samalari, postu adminiatrativu Baucau Vila, munisípiu Baucau, Rui Sorteiro Magno Siqueira, agradese ba Governu tanba simu ona osan insentivu $250 ne’ebé Parlamentu Nasionál aprova.

Notísia Relevante: PN aprova: saláriu xefe suku $140 hasa’e ba $250

“Ami agradese, normalmente osan insentivu hosi janeiru to’o juñu ami simu dala ida ona no horisehik (kuarta, 22 juñu) estrutura Konsellu Suku hotu-hotu tuir ona formasaun kona-ba livru 14 no aumenta tan livru haat no hamutuk 18 ona, hosi ne’e mak halo refresing training atu ezekuta ami-nia osan ne’e tama iha konsellu suku nian,” Rui hateten ba Agência TATOLI, liuhosi telefónika, kinta ne’e.

Normalmente osan hosi janeiru to’o marsu ne’ebé Governu la fó ne’e, agora simu kompleta to’o fulan juñu nian. Nune’e, ekipa konsellu suku tuir formasaun kona-ba livru haat ne’ebé liga ba atividade suku nian hodi bele sai baze dadus ida ba sira atu sikroniza.

“Livru uluk simu iha 2009 ne’e hamutuk 14 mak kona-ba rejistu komunidade, kuaze atendementu tomak ba atividade Governu nian no agora aumenta tan livru haat. Ne’e ami agradese tanba hosi livru ne’e ami bele foti baze ida-ne’e hodi bele sinkroniza ho dadus estatístika nian,” nia dehan.

Hosi livru 18, nia informa, dahuluk mak fixa família, iha livru ba rejistu ema mate no ema moris nian, seluk mak tenke rejistu projetu sira hotu mai iha suku, livru rejistu bainaka, ida fali kona-ba buat hotu ne’ebé mak Governu fó liuhosi ajénsia.

“Livru haat ikus ne’e mak kona-ba dadus populasaun nian, sira-ne’e mak ninia koluna to’o livru 18 ne’e,” nia esplika.

Aleinde ne’e, Xefe Suku mós husu Governu atu implementa saláriu tuir estandarizasaun Sekretáriu Estadu Formasaun Profesional no Empregu (SEFOPE) nian ba pesoál apoiu servisu administrasaun suku.

“Ita husu para tinan oin aloka osan karik aumenta pesoál apoiu servisu administrasaun suku nia osan no tenke saláriu estandarizasaun SEFOPE, nune’e ema hotu hanesan iha lei nia oin no labele halo diskriminasaun ba ema ida iha kotuk,” nia sujere.

Nia dehan, simu osan insentivu Xefe Suku nian $250, Xefe Aldeia $150, pesoál apoiu servisu administrasaun suku ho intensivu kada fulan ida $140, delegadu no delegada ho lia-na’in sira hasa’e ba $40 kada fulan.

Xefe Suku Bemori, Postu Administartivu Na’in Feto, Munisípiu Dili, Cristalina Pereira Soares de Oliveira, hateten osan insentivu ne’ebá mak Parlamentu Nasionál aprova ne’e sufisiénte ona ba sira-nia nesesidade.

“Ha’u simu ona osan insentivu $250 no ida-ne’e ha’u hanoin sufisiénte ona ba ha’u. Ha’u hakarak hato’o agardesimentu ba Governu tanba bele konsidera hodi aumenta ona xefe suku sira-nia osan kada fulan to’o $250,” Cristalina dehan.

Antes ne’e, Ministru Administrasaun Estatál (MAE), Miguel Pereira de Carvalho, hateten, bainhira membru konsellu suku eleitu iha 2004 hahú ho subsídiu sira ho valór $15, ho alterasaun subsídiu akontese iha 2012 no halo revizaun iha tinan 2014 konsege hasa’e insentivu subsídiu ba xefe suku sira ho $140 no to’o agora halo ona tinan hitu tempu ona presiza hasa’e insentivu ba líder komunitária sira.

Tuir dadus, iha territóriu nasionál ne’e xefe suku sira hamutuk 452 no hosi suku 452 ne’e, xefe aldeia hamutuk 2,233, pesoál apoiu administrasaun suku hamutuk 452, delegadu ka delegada no lia-na’in hamutuk 5,822 ne’e inklui Rejiaun Administrativa Espesial Oé-Cusse Ambeno (RAEOA).

Jornalista :  Osoria Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here