Reitór UNPAZ, Adolmando Soares Amaral. Imajen Tatoli/Egas Cristóvão

DILI, 23 juñu 2022 (TATOLI)–Universidade da Paz (UNPAS) halo ona prosesu rekursu administrativu hasoru Ministru Ensinu Superior Siénsia no Kultura (MESSK), Longuinhos dos Santos, tanba desizaun ne’ebé foti hodi trava prosesu kréditu UNPAZ ho Banku Nasionál Komérsiu Timor-Leste (BNCTL).

Reitór UNPAZ, Adolmando Amaral, hateten rekursu administrativu ne’ebé sira halo hasoru Ministru ne’e la’ós atu husu no ezije Governu loke fali prosesu kréditu ba sira, maibé atu hadi’a mekanizmu serbisu instituisaun públiku ba ninia parseiru sira.

“Ita labele husik aktu sira hanesan ne’e akontese ba individuu ne’ebé asume ona pasta nu’udar Ministru hodi halo buat ida tuir nia hakarak no gostu de’it, nu’udar Instituisaun Ensinu Superiór ita halo rekursu administrativu hasoru membru Governu ne’e hodi hadi’a, nune’e iha futuru labele akontese tan aktu sira hanesan ne’e,” Reitór informa ba Agência Tatoli, iha kampus UNPAZ, kinta ne’e.

Notísia relevante: IESP lima hato’o ona proposta asesu kréditu Ensinu Superiór Kualidade+

Pozisaun UNPAZ liuhosi prosesu rekursu administrativu ne’e aprezenta ona karta ba órgaun soberanu tolu hanesan Prezidente Repúblika, Primeiru-Ministru, Prezidente Parlamentu Nasionál inklui Prezidente Komisaun G, ne’ebé ekipa legál UNPAZ prepara hotu ona dokumentu formál no iha kuarta (22/06) konsege distribui ona ba órgaun kompetente sira ne’e.

Rekursu administrativu aprezenta ba órgaun tolu ne’e ho intensaun atu hetan resposta hosi Primeiru-Ministru no hatama diskusaun ne’e ba plenária entre deputadu sira iha Parlamentu Nasionál atu nune’e bele konvida parte universidade ho membru Governu relevante halo diskusaun.

Tuir nia, bainhira prosesu rekursu ne’ebé aprezenta ona ba órgaun tolu ne’e iha tempu besik la hetan resposta, mak UNPAZ sei lori prosesu tuir dalan legál hodi ba rejista iha Ministériu Públiku.

“UNPAZ lakohi nasaun ne’e ema lamenta ho situasaun balun, hafoin uza ninia kbiit hodi halo fali abuzu podér. Se hahalok hanesan ne’e maka akontese duni iha rai ida-ne’e maka Instituisaun Ensinu Superior primeiru ne’ebé halo prosesu hasoru sira maka UNPAZ. Ami la kontente ho Ministru ne’ebé halo empedimentu no ami la simu notifikasaun ida hosi Ministériu derepente de’it nia kansela prosesu kréditu ne’e sein razaun,” nia konta tuir.

Reitór dehan, bainhira UNPAZ hamutuk ho instituisaun sira inklui MESSK no BNCTL realiza asina akordu kona-ba polítika Ensinu Superior kualidade+ atu asesu kréditu laiha problema, maibé tama ona prosesu kréditu ne’e maka Ministru asina karta ida dirije ba BNCTL sein koñesimentu hosi UNPAZ.

“Karik Ministru hatene problema loloos ne’e, nia hanesan ami-nia parseiru konvida ami ba ko’alia ho nia hodi solusiona problema ne’e. Ami nunka hakarak halo kréditu tanba bele iha risku boot. Maibé orsamentu ne’ebé aprova aposta iha polítika Ministériu Ensinu Superior Siénsia no Kultura nia programa ida naran polítika Ensinu Superior Kualidade+ hodi fó oportunidade ba universidade hotu bele asesu no hetan garante hosi MESSK, entaun UNPAZ mós hakarak kréditu,” nia tenik.

Antes ne’e, Ministru Ensinu Superiór Siénsia no Kultura, Longuinhos do Santos, deklara ona katak pareser negativu nia hasai ona ba Instituisaun Ensinu Superior Privadu rua mak hanesan UNPAZ no Instituto Superior Cristal (ISC) tanba nia simu informasaun hosi BNCTL katak sira-nia proposta iha fallansu tékniku, tanba ne’e maka nia hasai pareser ne’e hodi husu instituisaun rua ne’e hadi’a buat balun.

Jornalista : Tomé Amado

Editora     :  Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here