Sekretáriu Estadu Kooperativa, Elizário Ferreira. Imajen Tatoli/Francisco Sony

DILI, 23 juñu 2022 (TATOLI)—Sekretáriu Estadu Kooperativa (SEKoop), Elizário Ferreira, semana ne’e, fó pose ba estrutura kooperativa kréditu uniaun tolu no kooperativa multi-setorál hamutuk rua, iha salaun Timor Rai Klaran, postu administrativu Aileu vila, munisípiu Aileu.

“Ha’u husu ba kooperativa foun lima ne’ebé foin estabelese atu evita dependénsia maka’as hosi ajudu li’ur, maibé apreende hamriik mesak ho ain rasik hodi nune’e bele iha sustentabilidade ba futuru, no mós kooperativa sira tenki iha interdependénsia ba malu, katak kooperativa sira tenki iha estudu komparativu ba kooperativa sira seluk,” governante ne’e hateten hanesan Agência Tatoli sita, kinta ne’e.

Notísia relevante: SEKoop-BCTL fasilita formasaun literasia finanseira ba formandór kooperativa

Serimónia pose ne’e akompaña mós hosi Country Director Plan International, Dellyana Ximenes, Sekretáriu munisípiu Aileu no Segundu Komandante Polísia Nasionál Timor-Leste (PNTL) munisípiu Aileu.

Antes ne’e Plan International harii grupu hamutuk 15 iha Aileu durante tinan barak nia laran hodi halo akompañamentu, maibé iha tinan kotuk grupu hirak ne’e iha inisiativa rasik hato’o pedidu ba parte SEKoop hodi fasilita formasaun bázika ba sira hodi nakfilak-an sai kooperativa tuir regulamentu ne’ebé maka iha.

“Ha’u agradese ba Plan International ne’ebé durante ne’e forma ona ita-nia komunidade no juventude sira iha tempu naruk nia-laran, parte SEKoop kontinua asegura kooperativa hirak ne’e atubele iha ninia sustentabilidade hodi fó moris ba vida ekonomia no membru sira iha rai laran,” nia akresenta.

Sekretáriu Estadu dehan, ba oin SEKoop sei fasilita formasaun no akompañamentu ba kooperativa hirak ne’e to’o hamriik mesak.

Iha biban hanesan, Country Director PLan Internasionál, Dellyana Ximenes, husu ba grupu hirak ne’ebé mak nakfila-an sai ona kooperativa, hodi nafatin hatudu unidade no valoriza malu maski hasoru problema kiik-oan sira, hodi nune’e kooperativa ne’e labele mate iha dalan klaran.

Kooperativa sira ne’ebé simu pose mak hanesan Kréditu Uniaun Tane no Haburas Komunidade Rural (CU THAKURA), Kooperativa Kréditu Uniaun Hamutuk Haforsa Susesu ba Futuru (CU HAHASUFU), Kooperativa Kréditu Uniaun Hamutuk Reforsa Ekonomia Rural (CU HRER), kooperativa multi-setoriál Juventude Haburas Agrikultura Munisípiu Aileu (JHAMA), no kooperativa multi-setoriál Hametin Komunidade Rurál (HKR).

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here