Prezidente Repúblika, José Ramos Horta, dada-lia ho jerente empreza Heineken, durante vizita ba fábrika serveja iha Hera, kinta (23/06). Imajen Tatoli/António Daciparu

DILI, 23 juñu 2022 (TATOLI)–Prezidente Repúblika (PR), José Ramos Horta, sujere ba Governu atu proteje investimentu hosi empreza Heineken iha Hera tanba fó empregu barak ba timor-oan sira.

“Ha’u vizita Heineken tanba investimentu internasionál ne’e kria empregu ba ema atus ba atus, serbisu balun indiretu tanba atu halo investimentu presiza barak no produtu nasionál ruma hanesan bee no aifariña. Ha’u haree mós tanba maski Governu autoriza fábrika ida iha ne’e, kria empregu maibé ladun fó protesaun ba investimentu, tanba husik nafatin serveja oioin mai hosi rai-li’ur,” Xefe Estadu hateten durante vizita iha fábrika serveja ne’e iha Hera, kinta ne’e.

Notísia relevante: Heineken introdús embalajen bebida foun ba konsumidór iha Timor-Leste

Prezidente Repúblika, José Ramos Horta. Imajen Tatoli/António Daciparu

Aleinde ne’e, nia nota katak Governu proteje serveja balun ne’ebé perigozu tebes ba joven sira tanba alkohólika iha balun to’o kedas 20% no balun tama ilegalmente.

“Governu la tau-matan ba ida-ne’e. Tanba ne’e ha’u mai vizita hodi haree. Ha’u la promove serveja tanba ha’u la hemu, ne’ebé ha’u laiha interese pesoál ruma, maibé ha’u preokupadu kuandu haree serveja ne’ebé alkohólika ne’e a’as tebes no nein selu impostu,” nia kestiona.

Tuir Horta, durante ne’e Governu aplika impostu ba Heineken no sira kontribui osan barak tama kofre Estadu, maibé sira seluk ne’ebé importa serveja karun ho alkohólika a’as tebes ne’e la selu. Enkuantu selu impostu mós la normál.

“Iha rai sira seluk kuandu serveja ho alkohólika a’as, impostu mós tenki a’as liu, iha Timór kontráriu fali. Tanba ne’e ha’u rekomenda ba Governu atu bandu importasaun serveja ne’ebé ho alkohólika liu nível padraun saúde públika no internasionál. Ida-ne’e ajuda proteje mós marka ida kria empregu iha Timor-Leste,” PR fó hanoin.

Antes ne’e, Heineken asina akordu investimentu ho Governu Timor-Leste iha janeiru 2015 no akordu ba rai no plantasaun Hera asina iha juñu 2015, maibé produsaun hahú iha janeiru 2017.

Iha Timor-Leste, Heineken hanesan investidór estranjeiru dahuluk ne’ebé maka investe iha setór fabrikasaun ne’ebé oras ne’e daudaun kria empregu direta no indireta ba timor-oan hamutuk 600 resin.

Empreza estranjeiru ne’e gasta ona millaun $38 hodi harii plantasaun multi bebida ho klase mundiál no sei prodús serveja oin-oin ho marka internasionál hanesan, Bintang, Tiger, ABC,  inklui bebida naun alkól seluk tan.

Heineken nu’udar serveja marka internasionál, ne’ebé eziste ona iha nasaun 170.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here