COVALIMA, 23 juñu 2022 (TATOLI)—Komandante PNTL munisípiu Covalima, Superintendente Basilio de Jesus, aprezenta preokupasaun komandu PNTL ba komisaun B Parlamentu Nasionál ne’ebé trata Asuntu defeza Seguransa no Negósiu estranjeiru atu halo rekrutamentu ba pesoál seguransa PNTL na’in-243 destaka iha Covalima.

“Ha’u ohin aprezenta ona ba komisaun B parlamentu nasional presiza atu aumenta pesoál polisia iha munisípiu Covalima aumenta 243 atu kompleta númeru 300 ba tinan 2023 to’o 2024 iha fronteira postu Tilormar, Fohorem, Fatumea, Fatululik no Maucatar ne’ebé ho efetivu na’in-hitu (7) de’it,” Superintendente Basilio de Jesus hateten ba jornalista sira, hafoin enkontru ho komisaun B parlamentu nasionál, iha salaun komandu PNTL Covalima, kinta ne’e.

Razaun atu aumenta pesoál seguransa PNTL iha Covalima, tanba hararak halo prevensaun tranzasaun ilegal iha fronteira entre sidadaun Timor-Leste ho sidadaun Indonesia.

Nia rekomenda ba komisaun B parlamentu nasionál atu kria merkadu tradisionál iha fronteira hodi fasilita komunidade atu faan sira-nia produtu lokal hodi hamenus movimentu ilegal iha fronteira.

Durante ne’e, PNTL Covalima rejista kazu ilegál iha fronteira tanba sidadaun sira halo movimentu hodi sosa nesesidade baziku liuhosi dalan ilegál.

Aleinde ne’e mós komandante aprezenta situasaun jerál no hato’o rekomendasaun ba komisaun B PN kona-ba kondisaun reál liga ekipamentu no meiu apoiu membru PNTL hanesan komunikasaun, transporte no seluk tan.

Prezidente komisaun Parlamentu Nasionál, José Agostinho Sequeira hateten, Komisaun B Parlamentu Nasionál nia prezensa iha Covalima haree situasaun no difikuldade ne’ebé durante ne’e komandu PNTL Covalima enfrenta.

“Ita ko’alia kona-ba efetivu ka membru parte ne’ebe sensivel ha’u la temi numeru, maibe presiza atu aumenta no hadi;a infraestrutura uniforma ba membru sira,” deputadu ne’e dehan.

Aleinde aumenta membru efetivu, nia parte ko’alia mós kona-ba situasaun no difikuldade ne’ebé komandu PNTL enfrenta hanesan sidadaun sira halo movimentu ho ilegál iha fronteira.

“Ami mai atu haree situasaun no difikuldade ne’ebé mak komandu PNTL Covalima enfrenta, hodi ko’alia kona-ba kauza atividade ilegál akontese iha fronteira mak sidadaun sira kontinua halo movimentu ilegál hodi buka hatene númeru kazu ne’ebé aas iha fronteira,” nia dehan.

Tanba, durante ne’e Timor-Leste seidauk iha kompañia ne’ebé importa mina-rai tanba atu evita atividade ilegál, liu-liu mina-rai ajuda komunidade sira sosa atu uza ba tein

“Ha’u rekomenda ba polisia bainhira ita kastigu ita nia fronteira tenke tetu valór ekonomiu bainhira komunidade lori mina-rai 5.000, ita bele fó sansaun maibé mina jerigen ida-ne’e nia presiza duni,” nia hateten.

Tanba ne’e tenke halo klasifikasaun ba atividade ilegál ne’ebé fo impaktu ekonomia hanesan tráfiku de arma, tráfiku umanu no droga sai hanesan polítika krime trans nasionál la’ós responsabilidade hosi polisia de’it maibé mós nasaun viziñu Indonézia.

Hafoin simu ejizénsia bainhira Governu aprezenta orsamentu jerál Estadu komisaun B hanesan trata asuntu defeza no seguransa iha obrigasaun atu haree sira-nia orsamentu kona-ba dezenvolvimentu hosi komandante.

Tuir dadus komunidade sira halo movimentu ilegal iha fronteira hanesan faan animál sira, ai-kameli, kami, bani-been, kafé, mina-rai, gazoel, motor, kareta, sigaru no tabakú.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here