Diretór Delegasaun PNDS munisípiu Viqueque, Higinio P. Z e Silva. Imajen Tatoli/Vitorino Lopes da Costa

VIQUEQUE, 23 juñu 2022 (TATOLI)–Programa Nasionál Dezenvolvimentu Suku (PNDS) munisípiu Viqueque deside suspende Uma Kbiit Laek (UKL+) 10 tanba liña ministeriál define ona fatin foun ba komunidade afetadu projetu Likifetu Naturál Gas (LNG) iha Beaço, suku Maluro, postu administrativu Viqueque vila, munisípiu Viqueque.

Tuir Diretór Delegasaun PNDS munisípiu Viqueque, Higinio P. Z e Silva, hateten, bainhira suspende define ona fatin foun mak foin implementa filafali UKL+.

“Autoridade, lia-na’in sira no reprezenta komunidade foin lalais asina ona akordu kona-ba entrega rai Beaço ba Governu hodi harii LNG iha Beaço. Tanba ne’e, ita sei suspende PNDS  uma 10 ba família benifisiáriu sira iha suku Maluro,” Diretór relata ba Agência Tatoli, iha ninia knaar fatin, kinta ne’e.

Notísia relevante: Populasaun 2.000 iha Beaço afetadu projetu LNG

UKL tolu ne’ebé antes ne’e harii dahuluk iha suku Maluro ne’e sei fó autoridade harii fali iha fatin seluk, tuir modelu ne’ebé benefisiáriu sira hakarak.

“Iha tinan ida-ne’e ita labele halo uma 10 inklui sede suku Maluro, tanba uma-tolu ne’ebé halo uluk ne’e seidauk iha akordu, entaun ita halo tiha ona uma-tolu ba benefisiáriu na’in-tolu, maibé agora iha ona akordu ita tenke suspende ona,” nia akresenta.

Antes ne’e, Vise-Ministru Administrasaun Estatál, Lino de Jesus Torrezão, husu ba Diretór PNDS munisípiu Viqueque no xefe suku Maluro labele implementa UKL iha área afetadu projetu LNG iha Beaço, tanba bainhira implementa nafatin aban bain rua sei sobu filafali.

“Programa UKL ba benefisiáriu sira hein lai labele implementa. Bainhira imi deside tau nafatin iha ne’e, sei sobu filafali tanba ne’e ha’u husu ba imi labele tau tan UKL 10 iha área afetadu ida-ne’e. Identifika ona fatin foun maka implementa filafali programa UKL no UKL+ ba komunidade kbiit laek sira hosi suku Maluro,” nia tenik.

Iha parte seluk, Xefe suku Maluro, Francisco Amaral, hateten, kona-ba PNDS iha suku Maluro tinan ne’e informa ona ba ekipa jestaun suku sira labele implementa iha área afetadu projetu LNG iha Beaço.

“Ha’u fó hatene ona ba ha’u-nia ekipa jestaun suku sira hodi labele implementa programa UKL no UKL+ iha área afetadu Beaço. Bainhira ita halo uma nafatin iha ne’e, aban bain rua sei sobu filafali ne’ebé ha’u-nia ekipa jestaun suku mós hatene ona,” nia dehan.

Jornalista  : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here